Huan, Jesu’n uain thuk a na dawn khit in, Zoh a hita, a chi a. Huan, a lu a kun a, a kha a khahta hi (Jn.19:30).
Jesu’n a Pa’ deihlam hih buching kia ut in anei hi (Jn.4:34). A Pa deihlam tuh Aman thuakna leh haksatna nou a dawn a, ei adia a hinna aluikhiak ahi hi (Jn.18:11; 10:15-17). A Pa pahtawi a thupina piak ut ahihman in hiai buchinsak a lin kei hi (Jn.12:27,28).
A hong sih in a hinsan, a nasep ding Pa’ deihlam tuh hih buching hi. Huaiziak in a sih dek in “Zoh A Hita” ana chi hi.
Hiai mah tuh tuni a en leng i lungsim a neih i tup ding in poimoh hi. Thil haksa leh lithuai hih ding a sawl i hihleh leng i utna leh deihdan pen koihkhia a, Pa’ deihlam hih i tup poimoh hi. Ei deihdan sang a Amah deihdan i poimoh ngaihzawk a, ei kipahtawina sang a Amah pahtawina piak utna i neih kisam hi. Huchi hileh i kross pua in niteng in Amah i zui thei ding hi.
Unaute zingpha. Tuni hun zatnuam chiat.