Na nna uh ka septheihna ding in midangte a kipan loh la in, saptuam dangte ka lok ahi (2 Kor.11:8)
Damtheihna toh kisai a screen et tam louh poimohna hong om khak ziak leh mimal buaina tuamtuam ziak in hun bangtan hiam Preacher’s Thought pen gelhzom theihlouh in om hi.
Tuni’n 1 Korinth 9:18 pansan a Tanchinhoih gentute loh piak diklou ahi; migentheite vakna ding a kipia thilpiak nemangtu ahihziak ua hiai thutak gen ngam kuamah omlou ahi chih ngaihdan pen Laisiangthou toh kituak mah hiam chih enchian leng ka chi hi.
1 Kor.9:18 pansan a Tanchinhoih gentute saptuam sum a loh piak diklou ahi chih sinsakna tuh sawltak Paul thugen theihsiamlouhna ban ah athutuun (context) enlou a Laisiangthou tang zatkhelhna liantak ahi.
1 Korinth 9 bung pumpi en lehang, a masa tang 14 (1 Kor.9:1-14) sung ah Paul in Tanchinhoih gentute loh (chawmna/support) piak ding ahihdan naktak in gen zaw hi. Tanchinhoih gentute’n loh a muh ding uh ahihdan a genna thumal khenkhat:
- Sepaih kua ahia amah kivak a galkap ngei?… (1 Kor.9:7)
- Huchi mah bang in, Toupa’n Tanchinhoih gente nek muhna ding in Tanchinhoih mah asep hi (1 Kor.9:14).
- Tempul a thil siangthou bawl vialvialte’n tempul a kipan nek amu ua, maitam a nasemte’n maitam a pan ane uh chih na thei kei ua hia? (1 Kor.9:13).
Tanchinhoih gentute nek muhna ding Tanchinhoih mah septu tuh kuamah dang hilou i Toupa’ Jesu Khrist mahmah ahi chih chiangtak in Paul in agen hi (1 Kor.9:14). Hiai mah tuh Jesus’n leng nungzuite a sawlkhiak lai in ana paipih a, “nasemmi loh mu tak ahi” chi in amau leh amau kichawm a Tanchinhoih gen ding in a sawlkhe kei a, a tunnate un nek-leh-tak ana piak ding un a koih zaw hi (Matt.10:9-10; Lk.10:7).
Tanchinhoih gentute’n Tanchinhoih mah a nek amuh uh a “right” (thuneihna) uh ahihdan genna in hiai thumal lel leng li veitak 1 Korinth 9 sung ah azang hi (1 Kor.9:4,5,6,12). Himahleh sawltak Paul in hiai thuneihna khat leng Korinth saptuam tung ah ka zang kei, achi hi (1 Kor.9:12,15). Huaiziak in hiai 1 Kor.9:18 tuh Toupa’ thupiak bang leh sawltak dangte bang a hiai thuneihna (right) nei himahleh Korinth saptuam tung a zanglou ahihdan a genna ahi zaw hi. Hiai toh kibang mah in sawltak dangte leh Kifas (Peter) bang a zi gingtami pi vialvial ding neihtheihna “right” nei ahihdan gen a (1 Kor.9:5), himahleh huai thuneihna zanglou hi (1 Kor.9:12). Sawltak Paul in hiai thuneihna a zatlouh ziak a Tanchinhoih gentute’n zi neih louh ding chihna ahihlouh mah bang in, Korinth saptuam kiang a Paul in loh alaklouh ziak a Tanchinhoih gentute’n saptuamte apan loh laklouh ding chihna hi zenzenlou hi.
Paul in Korinth saptuamte kiang mah ah hiai thuneihna a zatlouhna ziak uh alaikhakna nihna ah agen a, “kou sep bangbang a sem kichite kichihna ka bulkalh theihna ding in“, chi hi (2 Kor.11:12). Himahleh Paul in Korinth saptuamte apan loh a laklouh tuh saptuam dangte sang a aniamzawkna uh ahihziak in a khonung in “hiai ka diklouhna ah hon ngaidam un”, achi zaw hi (2 Kor.12:13).
Sawltak Paul in Korinth saptuam kiang a loh alaklouh hang a loh la ngeilou chihna ahi kei a, huai nak sang in “Na nna uh ka septheihna ding in midangte akipan loh la in, saptuam dangte ka lok ahi“, achi zaw hi (2 Kor.11:8). Hiai a loh (huhna) kichi thumal English ah “wages” (NKJV) ahia, huai tuh tha man, nasep man, ahihkeileh support (NIV-chawmna) chihna ahi hi. Paul in Korinth saptuam a loh lalou a asep theihna tuh saptuam dangte (churches – khat sang a tamzaw) apan loh a lak ziak ahi zaw hi. Philippi saptuam in leng sawltak Paul kiang ah panpihna ana pia uh ahi chih chiantak in muhtheih hi (Phil.4:14-16). Paul in a genna ah “thilpiak ka zon ziak ahi kei a, nou a ding a gahpung zong ka hi zaw“, achi hi (Phil.4:17).
Huaiziak in Tanchinhoih gentute vak tuh Toupa’ thupiak bang in saptuamte mohpuakna ahia, i sum-leh-pai neihdan zil a i sepzoh tan a sep ding nna ahi. Saptuam kia hilou in, mi malmalte leng mohpuakna piak in i om hi (Gal.6:6). Huchimah bang in Tanchinhoih gentute’n leng a poimoh leh a hun zil a sawltak Paul bang a mahni khut a nna sem in Tanchinhoih gentheih tham hi (Nas.18:3).
Maban ah 1 Korinth 16:1-3 a i muh Toupa’ ni thilpiak misiangthou gentheite a ding chi ahihleh bangziak a Tanchinhoih gentute vakna a zang ding chih toh kisai i gen nawn hi.
Unaute zingpha. Tuni hun zatnuam chiat.