Huan misiangthoute a dia thilpiak thu zaw, Galatia gam a saptuam pawlte kiang a thu ka piak bang in nou leng na hih sam un. Ni sagih ani masapen in michih in vualzawlna na muh bang zel un koih khawl chiat un; ka hong chiang a lakkhawm himhim a-omlouhna ding in (1 Kor.16:1-2).
1 Korinth 16 a i muh Nipikal Nimasapen ni a thilpiak pen gentheite panpihna ding ahi. Huaiziak in Tanchinhoih gentute loh piakna dia zat tuh thilpiak (thohlawm) zatkhelhna ahi chih ngaihdan toh kisai enchian le hang ichi hi.
Hiai i theihsiamna ding a poimoh bangzah hiam en masa le hang:
- Laisiangthou ah tualsung saptuam’ nasep ding golpipi thum i mu hi. Huaite tuh Tanchinhoih Genna/Evangelism (1 Tim.3:15; 1 Thess.1:8; 2 Kor.11:8), Khalam Kitundingna/Edification (Eph.4:12) leh Panpihna Nasepna/Limited Benevolence (Nas.6; 1 Kor.16; 1 Tim.5:16) chihte ahi uhi.
- Pathian in hiai mohpuakna lianpipi thum a piakte sepsuahna ding in saptuam in thohlawm (common treasury) nei ahihdan Laisiangthou ah i mu thei hi (Nas.4:34-35; 5:4; 1 Kor.16:1-3).
Saptuam nasep ding thumte lak ah Tanchinhoih Genna leh Kitundingtuahna nasepte sepsuahna ding a sum bangchi zon ding ahia chih Laisiangthou ah kimulou hi. Panpihna toh kisai ah akipanpihtuahna uh tamtak ah muh in om a, himahleh mun khat kia ah Nipikal Nimasapen ni a thilpiak tawikhawm uh ahi chih i mu hi (1 Kor.16:1-3).
Khenkhat in 1 Kor.16:1-3 pen mahni inn chiat a koihkholh ding gen ahi, achi uhi. Himahleh hiai tuh a dik kei hi. Huchilou hileh sawltak Paul a tun chiang in mahni inn chiat a akoihkholh teng uh inn teng a pai a alakkhawm nawn uh ngai ding hi. Huai a ut louh ziak in Paul in, “ka hong chiang a lakkhawm himhim a omlouhna ding” achi zaw hi. Hiai mah tuh kumzabi khatna a nungzuite’n a chiindan uh ahi chih saptuam khangthu leh khovel khangthu ah leng muhtheih hi.
I gennop pen 1 Kor.16:1-3 a i muh Nipikal Nimasapen a thilpiakte (thohlawm) zatna ah kiknawn ni. 1 Kor.16:1-3 in panpihna thilpiak toh kisai gen ahi chih tuh thudik ahi. Himahleh mundang tamtak a saptuam’ panpihna nasep i muhte ah thilpiakte a lakkhawm ni uh gen in om ngeilou hi. Huaiziak in 1 Kor.16:1-3 in panpihna thilpiak toh kisai kia hon hilhlou in, a thilpiak lakkhawm ni uleng hon hilh hi. Hiai tuh Thukhun Thak ah thilpiak lakkhawm ni i muhna om sun a suak hi.
Saptuam nasepna toh kisai ah 1 Kor.16:1-3 kia mu hile hang Tanchinhoih Genna leh Kitundingtuahna nasep chihte sep theihlouh mah ding hi. Himahleh panpihna nasep tuh saptuam nasep ding thum omte lak ah khat ahi lel a, saptuam nasep ding hiai kia ahi kei chih Laisiangthou mundang ah i mu hi.
Tanchinhoih Genna ding leh Kitundingtuahna ding a sum-leh-pai pai poimohte muhsuah ding dan Laisiangthou in hon hilhlou ahihziak in nungzuite masate chiindan enton in Nipikal Nimasapen in thilpiak kilakhawm hi. Hiai tuh apostolic approved example; Laisiangthou a i muhtheih omsun leh kituakpen ahi hi. Tu hun a Nipikal Nimasapen a thilpiak kilakhawmte panpihna nasepna ding kia hilou in, Pathian in tualsung saptuam mohpuakna a piak sepsuahna ding a suak hi. Huaiziak in hiai thilpiakte tuh Tanchinhoih Genna ding leh khalam Kitundingna ding a saptuam nasepte toh kisai a zatna ding ahi mah ahi zaw hi.
Unaute zingpha. Tuni hun zatnuam chiat.