Simon Peter in a kiang uah, Ngasa beng di’n ka kuan dek, a chi a. Amau a kiang ah, Kou leng na kiang ah ka hong sam ding uh, a chi ua. Huan, a pawt khia ua, longah a tuang ua, huai zan in bangmah a man kei uhi (Jn.21:3).
Tuni i tangteel tuh Jesu thohnawn nung a, anungzui Peter, Thomas, Nathanael, Zebedee’ tate Jakob leh Johan ban ah nungzui dang nihte a om khawm lai ua thil tung ahi.
A nek leh tak zonna uh ngasa beng (fishing) nusia a, Jesu nungzui a mihing man dia kipekhin hinapi a bang ziak a ngasa beng (fishing) dia kuan nawn dek zel uh ahi de aw chih theih hi.
A zuihpa uh Jesu lah hong kilak zom nawnta lou, amau lah sep ding dang nei nawnlou, ginglel leh thawmhau tak a om uleng hi kha ding hi. Mihingte zaw kilunglel baih mahmah sek hi maw! Khristian tamtakte leng hiai bang a ginglel in, Pathian ngak zoulou in ki-om kha sek hi.
Ahihkeileh Peter bang, Jesu a kitheihmohbawl nung a, Pathian’ adia zattaak kisa nawnlou a, a nek leh tak zonna ngasa ben mah a kik nawn mai ngaihtuah hi kha ding hi. Himahleh Peter hinkhua i et leh a nung in Pathian adia vanzat thupitak, Juda leh Zentelte kiang a Tanchinhoih tun masapen hong suak hi. Ei leng Pathian adia sawttak i kizat nung in leng Peter bang a Jesu i kitheihmohbawl hun om sek hi. Himahleh kisuanglah a lunglel a om mai lou in, “Pa aw, bangchi bang in hatlou in om mah leng, hon nutsiat sawmlou ka hi; hon ngaidam in” chi’n Pathian kiang zuan kik lehang, a vanzat manpha i hi thei lai hi.
Ahihkeileh zi leh ta nei khawng ahihtoh utoh a inkuan vakna ding ua nek zong a akuan uh poimoh leng hi kha ding hi. Jesu’n a damlai in “huai hun chiang in nou mau inn chiat ah na dalh vek ding uh” (Jn.16:32) chi’n ana genkhol hi. Pathian’ thu hilou a, amau hoihsak dan a kal hon suan chiang un nga man experienced mahmahte himahle uh khat leng a hon man kei uhi. Nga man ding hi nawnlou a, mihing man ding a Pathian in a sapkhiaksa ahih ziak un lohching theilou uhi.
Pathian mah ngak in, a kiang zuan in, a thu mah ngaikhia in a deihdan in kalsuan le hang, i taksa leh khalam a ding in hoihzaw ding hi.
Unaute zingpha. Tuni hun zatnuam chiat.