Huan, phalvak in Jesu piautak ah a ding a; himahleh a nungzui te’n Jesu ahi chih a thei kei uh. Huan, Jesu’n a kiang uah, Naute aw, nekding banghiam na nei uh hia? a chi a. Amau a kiang ah, Nei lou, a chi ua, a dawng ua (Jn.21:4,5).
Zan khovak a Tiberia dil a nga beng, bangmah manlou a om nung un phalvak in Jesu hong kilak tuh Jesu hih lam ana thei kei zomah uhi. “Naute aw, nek ding bang hiam na nei uhia?” chia hong dot hial chu nuam hetlou ding hi. Jesu a zuih ma ua zan khovak a len sep ua, a lohsap hun ua leng nek ding bangmah neilou zen a a-om lam uh kithei khalou hi. Hiai zingkal in tuh bangmah a nei kei hilhel uhi.
“Na theita uhia, kei thu lou in bangmah na hih thei kei ding uh chia kana gen khit hilou maw?” chia tai ek theih hina zenpi, kam khat lel leng awilouhna thu agen kei hi. I Toupa zaw itna leh hehpihna a kimdim hi maw! “Long siik taklam pang ah pai le uchin khenkhat na man ding uh” chi’n a hilh a, huchiin tamtak 153 tak hon man uhi. Toupa thupiak a khat vei lel len seh leng a hun tawk mahmah hi.
Huai kia hilou in hiai zingkal in i Toupa lawmlawm tuh nungzuite nek ding bawl in a pang hi. Mei pang ah zing an ne ding in hong tukhawm utuh midangte’n bangmah ngaihtuah kei le uleng Peter a ding in ngaihtuahna tuamtuam om ding in gintakhuai hi. Jesu a mat zan ua a kitheihmohbawlna lah mei phual kiang mahmah hilai! Ngaihtuahna a dawklou theilou ahi!
Tuni’n ei leng Peter bang a i Toupa ana zuausan ihi kha ding; himahleh Peter bang in kisuanglah hetlou in hon itsiam Toupa kiang zuankik ni. Itna bei theilou a hon it Jesu ahi. Dingkhiak nawnna ding kinepna nei nawnlou i hihkhak taak lehleng i Toupa om gige ahi; belkik ni, hon ngak den ahi.
Unaute zingpha. Tuni hun zatnuam chiat.