Jesu’n, Ka kumpi hihna hiai khovel a ahi kei; ka kumpi hihna hiai khovel a hileh, ka sikha te’n gal a dou ding uh, Judate kiang a piak a ka om louhna di’n; himahleh, ka kumpi hihna zaw hiai khovel a kipan ahi kei hi, a chi a, a dawng a. Huan, Pilat in a kiangah, E, kumpipa na hi maw? a chi a. Jesu’n, Hi e, kumpipa ka hi. Thutak theihsak ka piansan leh khovel a ka hong pai san ahi. Kuapeuh thutak a peuhmah in ka thu a sang uh, a chi hi (Jn.18:36,37).
Pilat in Jesu kiang a Kumpi ahihleh ahihlouh a dotna ah Jesu’n Kumpi ahihna agen hi. Himahleh Kumpi ahihna tuh hiai khovel ahi kei chih tuni i tangteel in chiantak in hon hilh hi.
Luke in Kha Siangthou’ pina in hichiin ana gelh hi, “Nou sing ah Jesu khaikang in na hihlum ua, i pipute Pathian in a kaithou nawnta ahi. Amah mah tuh Pathian in Kumpipa leh Hondampa a om di’n a taklam ah a hihlianta…” Nas.5:30,31). Huaiziak in Jesu Kumpi ahihna tuh khalam thil ahia, van a Pathian taklam a tu in Kumpi hihna toh vai a hawm hi.
Khenkhat te’n Jesu leitung a hong pai a, Kumpi hihna hong len a, Jerusalem a hong tu a, kum sangkhat vai hong hawm ding in a sinsak uhi. Himahleh hiai sinsakna tuh a dik kei chih tuni i tangteel apan in leng amuh theih hi.
Tuni a Jesu Khrist Kumpi a nei a, Amah vaihawmna nuai a athuthu a om ding in kisa thak ni.
Unaute zingpha. Tuni hun zatnuam chiat.