Laltutphah leh thil hing lite ma leh upate ma ah la thak hileh kilawm khat asa ua; leitung a kipat a huai leikhiaksate, nuaikhat singli-le-sanglite lou ngal kuamah in huai la atheithei kei uhi (Kil.14:3).
Kilakna 4 ah Pathian’ Laltutphah leh a kimvel a upa 24 leh thil hing 4 muhna omna thu i genta hi. Hiaite mai ah Belamnou toh dingkhawm mipi 144,000-te’n la thak a sakna uh tuni i tangteel in hon hilh hi.
A la thak sak uh tui tampi leh vanpiging bang in ging a, gosem tumte’n agosem tumging uh bang in a ging kilawm hi (Kil.5:8). Belamnou hatna ziak a amelmate uh tung a vualzoute ahihman un midang kuamah in a sakpih thei kei ua, a la thak sak utuh vualzohna la ahita hi (Kil.5:9).
Amaute tuh leitung apat leikhiaksate ahi uhi (cf.1:5-6; 5:9). Saptuam mite tuh Jesu Khrist’ sisan a leite ihi a (Nas.20:28), huaiziak in sawltak Paul in “man a leisa na hi uh” ana chi hi (1 Kor.6:19-20; 7:23). Numei lak a kihihninlou leh a siangthoute (virgin) ahi uh chih i mu hi (14:4). Huaiziak in gamsa leh a lim belou, khalam angkawm lou a sahkhua toh kisai a buahlou leh siangthou tak a om khristiante ahi uh chih i thei hi.
A paina lamlam a Belamnou zuite leng ahi uhi (14:4). Khrist nungzuihna tuh khemna pahtawina, gimthuakna, kousiatna leh mulkimhuaitak a sihna tanpha tuah theihna lampi ahi hi. Kilakna gelh hun a khristiante tuh Khrist lampi totte ana tawn a, Khrist mah bang a martyr a hihlup a omte ahi uhi. Himahleh van ah vualzohna la sa a muh in a omta uhi.
Amaute tuh Pathian a ding leh Belamnou a ding a gah masapen hi ding a mite lak a kipan a leisate ahi uhi (14:4). Jakob in khristiante tuh “A thilsiamte lak a gah masa i hong hihtheihna ding in, amah deihlam in thutak lak a pan in ahon suangkhia hi” ana chi hi (Jak.1:18). Thukhun Lui a gah masapente Pathian adia lat ahihmah bang ua Belamnou deihdan a kitahlut a kilaante ahi uhi (1 Pet.5:5,6 cf Heb.12:23).
A kam ua zuau omlou a gensiatbeite leng ahi uhi (14:5). Gamsa leh a zawlnei takloute zuauthu a a deih kei ua, huchiin Setan leh a vanzatte thuzohna akipan a kikem siangthou uhi. Khelhna neiloute ahi kei ua, himahleh Belamnou’ sisan a sawpsiang a om, Pathian in huai sisan tungtawn a gensiatbei a akoihte ahi uhi (1 Jn.1:7-9; Kil.7:17; Eph.5:27).
Belamnou phatna vualzohna la thak sak a tel chiat thei ding in ei leng amaute mah bang in i leitung khualzinna ah ginomtak in om chiat ni.
Unaute zingpha. Tuni hun zatnuam chiat