Huan angel dang van laizawl a leng ka mu a, ama’n tangtawn tanchinhoih, leitung a tengte kiang leh nam chih leh chi chih leh pau chih leh michihte kiang a genkhiak ding anei hi. Aw ngaihtak in, “Pathian kihta unla, amah thupina pia un; avaihawmna hun ahong tungta ngal a; van leh lei leh tuipi leh tuikhukte siampa amah bia un,” achi hi (Kil.14:6-7).
Johan in Belamnou toh dingkhawm mipi 144,000 te’n vualzohna la thak sa amuhlai in angel dang khat van laizawl a leng a mu hi. Hiai angel in leitung a teng namchihte kiang ah Tanchinhoih gen in, “Pathian kihta unla, amah thupina pia un; avaihawmna hun ahong tungta ngal a; van leh lei leh tuipi leh tuikhukte siampa amah bia un” chi in aw ngaihtak in a kikou chih tuni i tangteel ah i mu hi.
Hiai angel in leitung a Tanchinhoih gentu, thu nasem tengteng a ensak hi. Hiai Tanchinhoih gentute’n tuh Rome kumpite leh a sahkhua sang ua Pathian lauzaw a, thupina pia a, thilteng Siampa’ nna sem zaw ding in mite a hasuan uhi. Khristiante’n tuh mihingte sang a Pathian lauzaw a, mihing thupiak sang a Pathian’ thupiak i zuih a kiphamoh zaw hi (Nas.4:19-20;5:29).T
anchinhoih tuh Pathian thukhenna daak ahi a; khristiante a ding in vualzohna daak ahihziak in thu kipahhuai ahi hi. “Bangtan ka sisan phu uh lalou a om ding na hia?” (5:10) chih dotna pen dawnna hun atungta a, Rome lalgam leh a biakna dikloute uh puksiatna ding hun muhtheih ding a genlat in hong om touta ding hi.
Unaute sunpha. Tuni hun zatnuam chiat.