Huai nung in ka etleh ngai in, Zion tang tung a Belamnou dingh ka mu a, akiang ah mipi nuaikhat singli-le-sangli, atal ua a Pa min kigelh chiatte toh adingkhawm uhi (Kil.14:1)
Kilakna 13 ah gamsa leh zawlnei taklou thuneihna nuai a khristiante’n haksatna thupitak a tuah uh lauhuaitak a gen in om hi. A thuneihna hunsung uh sawtlou chik himahleh khristiante a ding in maban bing mahmah abang hi.
Himahleh leitung a lungkhamna huihpite pel lam ah tangtawn nisuak kilawmtak om hi. Tuni i tangteel Kilakna 14 ah Belamnou tuh a misiangthou 144,000-te toh Zion tang tung ah vualzoutak a dingh a muh in om hi. Hiai bung akipan in Pathian’ tate doudaltute’n mulkimhuaitak thil a tuahtouh dingte uh latsak in hong omta ding hi.
Zion tang ichih Jerusalem a om, Jebuste’n kulhpi muanhuai a aneih uh ahi. Himahleh David in ahong la a, Jerusalem ah kum 33 vai a hawm hi (2 Sam.5:7; 1 Kron.11:5). Thukhun Lui ah Zion tang Jerusalem genna ding in kizang a; tuni i tangteel ah van Jerusalem genna ding in hong kizang hi.
Kilakna 13:16 ah gamsa bia a anuai a kitahlutte atal ua chiamtehna piak ahi uh chih i mu a; tuni i tangteel ah gamsa be nuamlou Pathian’ ta 144,000-te atal ua a Pa min kigelh a chiamteh a om ahihdan uh i mu hi (7:3-4). Kilakna 7 ah leitung a muh in om ua; amaute toh kisai i genna ah Pathian’ misiangthoute, saptuamte genna ahi chih i genta hi. Tuni i tangteel ah amau tuh Zion tang, huai tuh van Jerusalem ah vualzoutak in Belamnou toh muh in omta uhi.
Kilakna 7 a i muhna ah angel 4-te’n Pathian’ thangpaihna leitung a gawtna apiak dingte un a hihnat khaklouhna ding a atal ua chiamteh in om uhi (7:3). Pathian venbitna tuh gentheihna leh sawina thuaklou ding a humbitna ahi kei a; aginna ziak un sihna tanpha leng tuak ding uhi. Himahleh sihna tanpha atuah hun uah leng tenna mun hoihzaw tung ding a chiamna ahi zaw hi.
Unaute sunpha. Tuni hun zatnuam chiat