Masidonia gam a ka hoh dek lai a k’on nget bang in Ephesa khua ah om gige in, huchia mi khenkhat thugin tuam himhim sinsak lou ding a na hilh theihna ding in (1 Tim.1:3)
Sawltak Paul in Ephesa khua a saptuam kum thum phial a om pih nung in, missionary khualzin thumveina ah saptuam upate Mileta khua ah sam in, “Ka pai nung in nge hangte na lak uah a honglut ding ua, pawlte a hawi kei ding uh chih ka thei hi. Noumau lak a mi nangawn, nungzui pawlte amau lam a kai mang di’n thu tuam gen na hong om ding uhi” chiin vauhilhna ana pia hi (Nas.20:29,30). Thugin (doctrine) dik poimoh ngaih mahmah ahi ding a, Timothy kiang ah leng hiai thu mah gen in, “thugin tuam himhim sinsak lou ding a na hilh theihna ding” a panla ding in tuni i tangteel ah i mu hi.
Bang chituk in kipe zou in, bang chituk in khami kichi in, bang chituk in Pathian nasepna lam ah leng hat kisa mah lehang, i kingakna thugin a dik kei leh a thawn hi ding hi. Huaiziak in Laisiangthou toh kituaklou sinsaknate tuh i dou a, i dal ding mah tuh Pathian deihdan ahi zaw hi.
Unaute zingpha. Tuni hun zatnuam chiat.