Huan angel khut a kipan in laibuzial neuchik ka la a, ka ne zou vek a; ka kam ah khuaizu bang in akhum a; huan ka nekzohtak in ka gil hihkhat in ahong om hi. Huan ka kiang ah, “Mi tampite leh namte leh paute leh kumpipate kiang ah Pathian thusuak na genkholh nawn ngeingei ding ahi,” ahon chi hi (Kil.10:10-11).
Van akipan aw in Johan kiang ah laibuzial neu hon sa a om tuh va la ding in a hilh hi (10:8). Huchiin Johan in leng a va la a, hon ne hi. A nek leh a kam a din khuaizu bang in khum (sweet) a, himahleh a nekzohtak in ka gil hihkhat in ahong om chih i tangteel ah i mu hi. Hiai akipan laibu neu in thu kipahhuai leh thu kipahhuailou tunkhawm ahihdan hon musak hi. Pathian in mi giloute tung a thukhenna a piak ding zekai sak hi nawnlou ding chih zak pen thu kipahhuai mahmah ahihlai in sawina huaisetak hun tomchik om tou zek lai ding ahihdan leh giloute tung a gawtna tung ding a zakte thu kipahhuailou khat suak hi.
Tuni i tangteel ah “Pathian thusuak na genkholh nawn (again) ngeingei ding ahi” chih i mu hi. Hiai a “genkholh nawn” (again) thumal in Johan tuh Patmos tuikulh a silou a, hiai mun a khum ahihma a anasep mah sem kik nawn ding ahihdan hon hilh hi. Kilakna laibu tuh Patmos tuikulh a Johan khum a a-om lai a Jesu Khrist kilakna amuh ahi chih i genta hi. Church Father khangthu gelhtu Irenaeus, Eusebius leh Jerome te’n Rome kumpi Domitian a sih nung a Johan leng khumbichilh ahihna Parmos tuikulh akipan khahkhiak a om a, Ephesa khua a kikhawm ahihdan ana gen uhi.
Unaute zingpha. Tuni hun zatnuam chiat