Himahleh angel sagihna in amut ding pengkulpi agin chiang in, huai hun chiang in, “Pathian thuguk, asikha zawlneite kiang a agenkhiak tak hihkim in a-omta ding,” chi in (Kil.10:7)
Kilakna 5 ah Pathian’ taklam a laibuzial Gakkipna Sagih a kingak i mu a, Jesu Khrist in huai Gakkipnate abanban in hon phel a, Kilakna 8 ah Gakkipna Sagihna a hon phel leh Pathian ma a angel sagih dinghte kiang a pengkul sagih piak in a om hi. Huai angel sagihte’n a pengkul tawite uh abanban in a hon mut ua, Pengkul Gukna tan mutzoh in a omta hi.
Tuni i tangteel in Pengkul Sagihna mut ahihchiang chiang a thil tung ding a hon gen a, huai tuh “Pathian thuguk, asikha zawlneite kiang a agenkhiak tak hihkim in a-omta ding” chih ahi.
Thuguk ichih a kilangkhelou, hihlat a omlou thu ahi hi. Jesu Khrist a hong sihma in Pathian’ hotdamna lampi thilgeel mihingte a theichian a omlouh ziak in thuguk a gen in om a, himahleh tun bel thuguk hi nawnlou in hihlat hita hi (Rom.26:25-26; Eph.3:3-7; Kol.1:26). Tuni i tangteel a i muh mah bang in Pengkul Sagihna mut ahihchiang in Pathian’ thuguk dang hihlat in om ding a, huai tuh Pathian’ lalgam tunkhiak a omta, doutu kuamah in suchimit zoulou ding ahi hihlat hi ding hi.
Jesu Khrist hong pianma kum 600 paita in Pathian in zawlnei Daniel tungtawn in lalgam lina Rome kumpite vaihawm lai a lalgam khat tungkhe ding ahihdan ana genkhol hi (Dan.2:40, 44-45). Hiai genkholhna tuh Jesu Khrist han apan thohnawn a Pathian’ taklam atut in suktangtung in ana omta hi (Mk.1:14-15; 9:1; Dan.7:13-14; Eph.1:20-23; Nas.2:30, 33-36). Hiai lalgam kigen tuh khovel lalgam hilou in khalam lalgam, tangtawn a dingh den ding lalgam ahi hi (Jn.18:36; Dan.2:44). Daniel mah in hiai lalgam tuh Rome kumpite’n dou ding ahihdan ana genlawk hi (Dan.7:15-28). Daniel genkholh mah bang in Jesu Khrist phuhkhiak khalam lalgam (saptuam) tuh Rome kumpite’n a hon dou ua, himahleh ana dou zoulou uhi. Huai nak sang in, “Tungnungpen misiangthoute’n lalgam atang ding ua, tangtawn, tangtawn in, gam aneiden ding uhi” (Dan.7:18, 22, 27).
Angel Sagihna in a mut ahihchiang in Pathian’ lalgam doudaltu Satan leh a vanzat Rome kumpite tuh Pathian in a sukchimit ding dan latsak hi ding hi. Hiai hun ding tuh zekai sak hi nawnlou ding hi (10:5).
Unaute zingpha. Tuni hun zatnuam chiat