Huan tuipi tung leh leitung a angel dingh ka muh in van lam ah akhut taklam aliktou a; huchi in huai tangtawn a hing van leh leitung leh asung a om tengteng leh tuipi leh asung a om tengteng siampa min lou in azekai nawnlouhna ding chi in akichiam hi (Kil.10:5-6)
Laibu neu tawi angel hat tuh humpinelkai humham bang in aw ngaihtak in a kikou a, huaichiang in van ging sagihte’n a aw-te uh a hon suah zel uh chih i mu hi. Thukhun Lui ah hiai bang aw suak tuh Pathian’ aw genna ding in kizang sek a, Toupa’ mite adi’n muanna hi a, himahleh a melmate adi’n dipkuatna hi sek hi (Joel 3:16; Hosia 11:10; Amos 3:8).
Van ging sagihte aw Johan in a gelkhiak dek chiang in, van akipan aw khat in gelhkhelou ding leh im bikbek ding in a hilh hi (10:4). Hiai in Pathian in a mite a humbitna dia a ut dandan leh poimoh a sak hunhun a nna sem thei ahi chih hon lak hi. En amah a muanna koih peuhmah le hang a nasep dan leh athil hih ding dan teng i theih teitei poimoh khollou hi (Deut.29:29).
Tuni i tangteel ah angel hat in van lam ah akhut taklam liktou a; huchi in bangmah zekai sak nawnlou ding in a kichian chih i mu hi. Gakkipna Ngana phel ahihlai a Martyrte’ thumna dawnna tuh zekai sak hi nawnlou ding hi. Pathian in vaulawkna tamtak peta mahleh a khelhna uh kisik nuamlou in om lailai uhi (9:20-21); huaiziak in Pathian vaihawmna tuh kintak sepsuak hita ding hi.Tuni’n en leng i tung a Pathian’ dohzohnate ngai neu kei ni.
Unaute zingpha. Tuni hun zatnuam chiat