Huan meipi puansilh a kizem van a kipan angel hat dang hong paikhesuk ka mu hi; alutung ah sakhituihup a-om a, amai nisa mah abang a, akhete mei khuamte bang mai ahi. Akhut a laibuzial neuchik honsa atawi a; akhe taklam a tuipi tung sik in akhe veilam leitung ah anga hi (Kil.10:1-2)
Pengkul 6na zoh phet in angel hat khat a hong kilang chih tuni i tangteel ah i mu hi. Kilakna 5:2 ah leng angel hat khat i mu a, huai angel in Pathian’ taklam a laibuzial gakkipna sagih a kingak a phel dia chitna a om leh omlouh dotna a bawl hi. Tuni i tangteel ah leng angel hat laibuzial neuchik honsa tawi a kimu a, hmahleh a laibuzial tawi toh gakkipna sagih a kingak laibuzial Kilakna 5 a i muh toh i theihkokalh louh poimoh hi.
Tuni i tangteelna angel hat tuh meipi puansilh in a kizem hi. Alutung ah sakhituihup a-om a, amai nisa mah abang a, akhete mei (fire) khuamte bang hi. Thukhun Lui ah meipi tuh Pathian’ kangtalai bang a gen in a om a (Sam 104:3); sakhituihup tuh Pathian’ laltutphah kivatna toh teh in a om a (Ezek.1:28), mellamdanna tang ah Jesu’ mai tuh ni mah bang in a tang chih i mu hi (Matt.17:2). Sakhituihup tuh ni sa in a salh meipite apan hong om ahi chih i thei a, huaiziak in hiai angel hat tuh Pathian leh Jesu Khrist apan hong paikhia ahi chih muh theih hi.
Tuni i tangteel mah ah hiai angel hat in tuh akhe taklam in tuipi tung a sik a, akhe veilam leitung ah anga hi chih i mu hi. Hiai in Pathian akipan khovelte theih dia gen ding thu nei ahi chih muh theih hi.
Hun paisate a Pathian vaulawknate ngeingaihlou a kisik nuamloute tung a thil tung dingte maban ah chiang zaw sem a suklat in hong om ding hi.
Unaute zingpha. Tuni hun zatnuam chiat