Huan sialluang chiang bang tehna chiang khat piak in ka om a; angel in, “Thou inla, Pathian tempul leh maitam leh huai a bete teh in“ (Kil.11:1).
Tuni i tangteel ah Johan tuh Pathian’ temple teh ding a sawl in om hi. Saptuam mi malmalte tuh Pathian temple ihi ua, huaiziak in temple tuh saptuam genna ding kizang gentehna kampau ahi hi (1 Kor.3:26-17; Eph. 2:21-22). Tuni i tangteel a tehna kigen leh Kilakna 7 a mi 144,000 chiamteh a om (7:3-8) te’n kibatna a nei ua; hiai in Pathian humbitna tang ding uh ahihdan a hon lak hi (cf.Zek.2:1-5).
Thukhun Lui ah tehna tuh a tak leh a naran, a siangthou leh a siangthoulou khentuamna ding in leng a kizang hi (Ezek. 42:20 cf. 22:26). Laisiangthou in, “Milimte leh Pathian tempul in leng bang ahia kituahna aneih uh? Eite zaw Pathian hing tempul i hi ngal ua… Huaiziak in alak ua kipan in hong pawt unla, atuam in om un, thilsiang lou himhim khoih kei un, Toupa’n achi” (2 Kor.6:16-17) achih bang Pathian in a mite leh a mi hiloute khentuam hi. Huaiziak in Pathian in a mite a tuam a om di’n a teh a, amaute humbit ding leh a lak ua teng ding ahihdan tuni i tangteel apan i mu thei hi. Hiai tuh i gentaksa angel hat in a tawi laibu neu a thu kipahhuai kituun ahi hi.
Pathian’ temple ihihna nelhsiahlou in a humbitna huangsung a om chiat thei din a huang polam ah pawt kei ni.
Unaute zingpha. Tuni hun zatnuam chiat