Tempul huangsung polam ahihleh nusia inla, teh ke’n; Zentelte kiang a piaksa ahih tak ziak in; huan kho siangthou akhenuai un kha sawmli-le-nih sung asikden ding uhi (Kil.11:2).
Thukhun Lui ah biakbuk (temple) kibawl dan i et leh temple huangsung polam om a, a temple pen Mun Siangthou leh Mun Siangthoupen in kikhen hi. Mun Siangthou sung ah maitam om hi.
Tuni i tangteel ma chet tang khat ah a temple leh a sung a maitam leh huai a bete teh ding in Johan sawl in a om uh chih i mu a, huai tuh Pathian in a mite a humbitna thuchiam ahi chih i genta hi. Tuni i tangteel ah ah temple huangsung polam tehlou ding leh Zentelte kiang a piaksak ahi chih hilh in a om hi. Pathian misiangthou hilou, Zentelte leh temple huangsung polam, khristian minpu ginomloute (Lk.6:46) tuh teh a om khalou ahihman un Pathian apan humbitna mulou ding uhi.
Khopi siangthou tuh kha 42 sung sikden in a om ding chih i mu hi. Thukhun Lui ah khopi siangthou tuh Jerusalem genna ding in kizang a, saptuam tuh van Jerusalem chia gen in a om hi (Heb.12:22-23). Huaiziak in hiai khopi siangthou tuh Pathian’ saptuam genna ahi hi. Saptuamte tuh naktak a sawi a om ding uh ahihdan uleh sawina a thuak hunsung ding uh muhtheih hi. Zawlnei Daniel in leng hiai hunsung Tungnungpen misiangthoute’n (saptuamte’n) sawina tuak ding uh ahihdan ana genkhol hi (Dan.7:25). Himahleh hiai sawina nasatak a tuah hunsung uh Pathian in humbitna pe ding hi.
Hun paisate ah khovel kumpi hat taktakte’n saptuamte sawi in sukbei na sawm sek mahle uh Pathian in a saptuamte humbit a, beihsak zoh in ana om ngeilou hi. Pathian in a tate khemna leh thuakna tuamtuamte tuaklou ding in hon chiam kei a, i tuah hun in leng i thuakzoh theihna ding in lampi hon bawlsak zel hi (1 Kor.10:13). Pathian in i haksat hun in hon humbit nuam mahle i humbit theihlouh dia temple huangsung polam a i na om khak ding lauhuai hi.
Unaute zingpha. Tuni hun zatnuam chiat