Huan ka theihpihtu nihte kiang ah thilhihtheihna ka pe dia, amau sai-ip puan silh in ni sangkhat zanih-le-sawmguk thu agenkhol ding uh achi hi.” Hiaite olive sing nihte leh khawnvak koihna nihte, leitung a Toupa ma a dinghte ahi uhi (Kil.11:3-4).
Saptuamte tuh gentehna kampau in kha 42 sung sawi a om ding uh ahihdan leh huai hunsung a Pathian in humbitna pe ding ahihdan i genta hi. Hiai sawina hunsung tuh gendan tuam in tuni i tangteel ah ni 1260 a gen in om a, hiai hunsung in theihpihtu nihte kiang ah Pathian in thilhihtheihna pe dia, huchiin amau genkholhna thu gen ding uhi.
Theihpihtu nih chia gen a omte kuate ahi ding ua chih toh kisai ah ngaihdan tuamtuam Enoch leh Elijah; Zerubbabel leh Joshua ahihkeileh Elijah leh Mosi ahi, chihleh a tuamtuam kawksak a om uhi. Himahleh Kilakna paidan, gentehna kampaute kizangte leh theihpihtu nihte hihna i et chiang in Rome kumpite sawina nuai a leitung a om Pathian’ thu puangzaktu saptuamte agenna ahi chih muhtheih hi.
Theihpihtu nihte tuh olive sing nihte leh khawnvak koihna (lampstands) nihte ahi chih i mu a, Kilakna 1:20 ah khawnvak koihna (lampstands) pen saptuam sagihte ahi chih i mu hi. Olive tuh khawnvak a kuang na ding a thau petu ahia; Pathian’ thu genna ding a kizang gentehna kampau ahi chih muhtheih hi (Zek.4:1-6). Nih kichi thumal tuh theihpihtu muantaak (competent testimony) ahi chihna ding in Thukhun Lui hi in Thukhun Thak hitaleh a kizang hi (Deut.17:6; 1 Tim.5:19). Theihpihtu nihte nasep ding tuh thu genkholh ahi chih i mu a, kiang ah thilhihtheihna piak a a-omna in a thugente Pathian akipan ahi chih a hihkip hi (cf.Mk.16:20).
Rome kumpite’n naktak in saptuamte sawi mahle uh saptuamte tungtawn a Pathian’ thu tawplou a puanzak a om ding ahihdan Johan hilh a om ahihdan tuni i tangteel apan i mu ahi. Tuni a Pathian’ saptuamte’n leng sawina leh haksatna tuamtuam hunte ah leng kumzabi khatna a saptuam masate mah bang in Pathian’ thutak gen a dalhzaksaktu hi a, theihpihtu muanhuai hi ding in panla ni.
Unaute zingpha. Tuni hun zatnuam chiat