Himaleh, nang Pathian mipa aw, huai thilte taisan inla, diktatna bang, Pathian limsakna bang, ginna bang, itna bang, thuaktheihna bang, kingaihniamna bang delh zel in. Ginna kidouna hoih sual inla, khantawn hinna tuh len chinten in; huai tang ding a sap na hihi; theihpih tamtakte mitmuhin gupna hoih tuh na gumta hi (1 Tim.6:11,12)
Pathian mite a ding in i taisan ding thil om a, huaite taisan a kross a i kilhden ngai hi. Tuni i tangteel ma chet i sim leh dangka sum deihtak tuh gilou chiteng bul ahi achia (1 Tim.6:10), huai dangka sum deihtakna ziak in enna, ginna apan pialmangna leh mahni leh mahni lungkham kitutna om ahi achi hi. Sum pen poimoh tham a, en i thunun laiteng a siatna omlou hi. Himahleh a sum in hon thunun zawk chiang in buaihuai hi. Huaiziak in Paul in hiai thilte taisan ding in Timothy ana hasuan hi. Hiai in Pathian nasemte leng a khengval a sum deihtakna a puk theih ahihdan hon musak hi.
I taihsan ding thilte i taihsan tan lel hunlou in, maban ah i delh ding, i hinkhua a nei a i hinpih ding thil om hi. Huaite tuh tuni i tangteel a i muh bang in diktatna, Pathian limsakna, ginna, itna, thuaktheihna leh kingaihniamna chihte ahi. Khatvei thu in hiaite i neizou vek pah kei maithei, himahleh neih teitei sawm a i delh a poimoh hi.
Taihsan dingte taisan a, delh dingte i delh zoh chiang in leng i vualzoh gige theihna ding in niteng, hunteng a khalam gal i dou gige poimoh hi. Hiai khalam kidouna ah ceasefire chih bang om theilou hi. Eimah mah a om khelhna hih utnate omte dou a i hihlup pahpah ngai hi. Huaiziak in tangtawn hinna i khahsuah louhna ding in taihsan dingte taisan a, delh dingte delh a, dou dingte dou ding in i kihasuan hi.
Unaute zingpha. Tuni hun zatnuam chiat.