Lungkimna toh kithuah Pathian limsakna tuh punna thupi tak ahi. Khovel ah bangmah i lut pih kei a, bangmah i pawtpih thei sam kei ding hi. Himahleh, nek ding leh silh ding nei in, huai khawng ah i lungkim ding uh (1 Tim.6:6-8).
Mihing ngaihtuahna ah neih leh lam tampi nei in, sum leh pai tampi khawng nei le hang kilungkim mai ding in ngaihtuahna om sek hi. Himahleh huai ana hi dek kei hi.
Khovel ah gou tampi kholkhia in om mah le hang i sih chiang a i puak theih ding khat leng omlou hi. Si diing dinmun taktak a i ding hial chiang in khovel goute sang mah in i khalam dinmun mah kingaihtuah zaw sek a, huaite mah in i lungsim luahzaw tham hi. Hinapi in, i dam a i hatlai in i khalam dinmun pen i nelhsiah pen hi kha nak hi.
Tuni i tangteel a i muh mah bang in nek ding leh silh ding i neih nak leh huai khawng mah ah lungkim thei le hang tawldam huai mahmah ding hi. Himahleh khovel ah hiai tuh thil hitheilou phial toh a kibang hi. Hiai in lungkimna taktak pen khovel thilte a om ahihlouh dan hon musak hi. Lungkimna taktak pen Pathian ah om a; huaiziak in Pathian limsakna nei a tantawk a lungkim theite tuh khovel a mi hausapen leh nuamsa pente ahi uhi.
Unaute zingpha. Tuni hun zatnuam chiat.