Huan, Jesu aw ngaihtak in a kikou a, Pa, na khut ah ka kha ka hon kemsak hi a chi a. Huan, huai a chih khit in a kha a khahta hi (Lk.23:46)
Kingaihsiatna tuh gingtu tamtakte’n a taktak a ana tuah khak thil uh ahi. Ginna a mi minthang taktak Mosi, David, Elijah, Jeremiah leh a dangdangte’n leng ngaihtuahna tongkhong kisa in hinkhua ana zang kha chiat uhi.
Midangte a ding in hiai bang ana tuakkhate lunggimna leh thawmhauna theihsiam sang in mohsak baihlam zaw hi. Tamtakte’n hiai kingaihsiatna tuh baihsam tak a zoh theih ding in kingaihsun hi. Pathian ah kinga zou peuh le chin dam mai ding na hi chih awlsam mahmah hi.
Kingaihsiatna ichih baihsam tak a sungveng theih thil ahi kei hi. Himahleh Pathian’ tate i hihna ah etdan tuam deuh a maituah theihdan om kha ding hi.
I damsung hiai natna toh khosa ding leng i hi kha mai thei; hiai ziak in midangte sang in Pathian naih tuntun zaw le bang achi dia? Ei bang a haksatna tuakte hehpihna leh lainatna nei sem le bang achi dia? Kingainiam zaw in eimah kia a, Pathian tellou a hi theilou ihi chi le hang bang achi dia? I haksat kawmkawm in thum in; Jesu’n, “Pa, na khut ah ka kha ka hon kemsak hi” achih bang in en leng i hinkhua Pathian khut ah aap in chisam le hang bang achi dia?
Pa aw, hiai bang haksatna leh lungkhamna om nawnlouhna gam ka tun hun ding uh ka ngai uhi. Kingaihsiatna nei khempeuhte vualzawl inla ompih in. Nang a lametna nei thei ding in panpih in.
Unaute zingpha. Tuni hun zatnuam chiat