Huan huai gam mah ah belamchingte a-om ua, gamlak ah zan in abelamhonte uh aching uhi.Toupa angel khat akiang uah ahong dingh a, Toupa thupina in akim uh atanvak a; huchi in alauta mahmah uhi. Huan angel in akiang uah, “Lau kei unla, ngai un, michih a ding in tanchinhoih kipahhuai mahmah ka hon tut ahi. Tuni in nou a ding in David khua ah Hondampa apiangta, amah Khrist Toupa ahi. Hiai nou a ding in chiamtehna ding ahi; naungek puan a tuam, gan anpiakna kuang a lum na mu ding uh,” achi hi (Lk.1:8-12).
Jesu hong pianna toh kisai Laisiangthou ah amun, vaihawmtu, Thukhun Lui zawlneite genkholhna tangtunna thu chihte leh thiltung tuamtuam tamkhop Laisiangthou in hon hilh hi. Himahleh a lamdang mahmah bel a ni leh akha chihte Pathian in Laisiangthou ah ana gelh telsak hetlou hi.
I Toupa Jesu ngei leng leitung a kum 33 leh kim vel hong khosa hinapi a pianni a lopna leh lop ding a athupiakna khat leng muh ding omlou hi. A nungzuite kiang ah, “Thutak Kha a hong tun chiang in, thutak tengteng ah nou ahon pi ding” (John 16:13) chia a chiam bangbang in Nasepte 2 ah Kha Siangthou hong tung a, huchiin Kha Siangthou pina nuai ah kum 60 val Pathian a biaknate uleh a nna asepnate uh gelhkhiakna Thukhun Thak laibu sung ah Jesu pian ni leh a kha gendawk khak in om hetlou hi. Pathian in zaw mihingte theih ding a poimoh sa hetlou eive chih muh theih hi.
December 25 Jesu pianni dan a lop tuh AD 300 nung lam a hong kipan pan ahia; Laisiangthou gelh hunlai a zat ana hilou hi. Khristmas kichi thumal leng English pau lui (Old English) “Cristes Maesse” (“Mass of Christ”) kichi apan hong piang, gelhthoh a muh masakna pen AD 1038 kum ahi. Jesu sihnung kum 1000 nung a Khristmas chih thumal kizangpan chihna suak hi.
Laisiangthou apan in Jesu pian hun tuh belamchingte’n gamlak a belamte a ching hun lai uh ahi chih i mu hi (Lk.2:8). Judea gam ah phalbi lai (December – January) in gamlak ah belamchingte om ngeilou ua, a tangpi in khallai (spring – March/April) akipan phavang (autumn – Sept./October) kikal ah ching uhi. Huaiziak in December kha a piang ding in bel gintakhuailou himhim hi.
Jesu pianni dan a December 25 Khristmas chia lop tuh Catholic saptuam in ahon patkhiak Protestant saptuam tuamtuamte’n ahon zuihtouh uh ahia, Laisiangthou a kimu leh Pathian thupiak ahi kei hi.
Unaute sunpha. Tuni hun zatnuam chiat