“Jesu Khrist hong piandan hichibang ahi…” (Matt.1:18). “Theophilus aw, abul a pan bangkim chiantak in ka sui a, kizom zel in nang a ding in kigelhleh ahoih ding,” ka chi hi (Lk.1:3). “Atung in Thu a-om a, Thu tuh Pathian kiang ah a-om, huai Thu Pathian ahi” (Jn.1:1).
Khristian tamtakte’n Jesu Khrist hong pianna toh kisai thugennate ah i zak mun uh gintakhuai hi. Himahleh Laisiangthou a kigelhdante hoihtak a sim detdet a, suut a kisinsakna tam din gintakhuailou hi.
Jesu Khrist hong piandan toh kisai Matthai laibu kia ah sim le hang Baptistpa Johan’ nu-leh-pa toh kisai, Mary kiang a angel kilakna leh Belamchingte vehna thute kimaihkha ding a; Luke laibu kia sim le hang Joseph kiang a angel kilakna, Mipilte vehna, Herod in naupangte a thahna leh Matthai in Thukhun Lui a genkholhnate Jesu’n a suktangtung a genlatte kitheikhalou ding hi. Johan laibu simlou hi lehang Jesu Khrist Pathianna (divinity), 100% Pathian ahihna leh 100% mihing a hihnate kitheikhalou ding hi.
Tuni’n Matthai leh Luka laibu a kigente la khawm in Jesu Khrist piandan leh pianna toh kisai leh a thiltungte a kizom dan in bultuah le hang ichi hi.
- Baptistpa Johan pian ding genkholhna (Lk.1:5-25)
- Mary kiang a Jesu pian ding thu genna (Lk.1:26-38).
- Mary in Elizabeth a vehna (Lk.1:39-45)
- Mary’ phatna la (Lk.1:46-56). Elizabeth kiang a kha 3 va om in, huchia Nazareth a kiknawn.
- Baptistpa Johan pianna (Lk.1:57-80).
- Jesu pian ding thu Joseph hilhna (Matt.1:18-25).
- Kaisar Augustas in min khum ding thupiak a bawlna (Lk.2:1-5).
- Bethlehem a Jesu pianma (Lk.2:6-7; Matt.1:25).
- Belamchingte kiang a angel kilakna (Lk.2:8-14).
- Belamchingte’n naungek Jesu a vehna (Lk.2:15-20).
- Jesu min phuahna leh zeksumna (Lk.2:21). Mosi’ dan dungzui a ani giatni a zeksum in amin piakna neih a om (Lev.12:3).
- Temple a kisiansakna (Lk.2:22-24). Hiai kisiansak ni tuh zeksum ni toh a kibang kei hi. Thukhun Lui dan dungzui in numei in ta pasal a neih chiang in ni 7 sung numei dan ngeina hun a asian louh bang in sianglou in om a, a ni 8 ni in naungek pen zeksum sak in om a; ni 33 kisiangsak in om lai hi. Huchiin ni 40 ni in biakbuk (temple) ah siampu kiang ah kisiansakna neih in om hi. Hiai hun in halmang thillat belamnou kum khat a upa leh khelhna thoihna ding in vapalnou ahihkeileh vakhu hiam hon tawi in siampu in Toupa ma ah lan hi (Lev.12:1-7). Mizawng belamnou tawi zouloute’n vakhua kop khat hiam, vapalnou kop khat hiam tawi thei ding in Pathian in phalna pia hi (Lev.12:8). Huaiziak in Jesu Khrist siansakna hun pen Mosi’ dan dungzui in ni 40-ni a neih a om ahi chih i theithei hi. Jesu’ nu leh pate’n vakhu kop khat hiam vapalnou kop khat hiam hon lan ahihna uah mi hausa hilou ahihna uleng theihtheih hi (Lk.2:24).
- Simeon kipahthu genna la (Lk.2:25-35).
- Zawlnei Anna phatna (Lk.2:36-38).
- Mipilte’ vehna (Matt.2:1-12). Tamtakte’n suahlam mipilte toh Belamchingte a kibang dan in ngaihsun kha uhi. Mipilte tuh Juda mi hilou in Zentel mi ahi ua, belamchingte toh akibang kei uhi. Belamchingte’n a pianni nitak mahmah in va veh ua, himahleh mipilte bel suahlam akipan hong pai ahi ua, temple a sinsakna zoh nung in a tung ua, Jesu insung ah ava mu uhi (Matt.2:11). Belamchingte’n bel gan anpiakna kuang ah puan a tuam ahihlai in amu uhi (Lk.2:12,16). Mipilte mi bangzah ahi ua chih Laisiangthou in ahon hilh kei a, a thilpiak uh thum ahihziak in mi thum dan in sinsakna ana om kha a, huaiziak in tampite’n Laisiangthou enchianlou in mi thum kisa kha hi. A thupiak uh thum ahihziak in mi thum ahi uh chihna omlou hi. Himahleh Laisiangthou in mipilte chi ahihman in khat sang a tamzaw bel ahi peuhmah uhi.
- Aigupta a taina (Matt.2:13-15)
- Herod in naupangte a thahna (Matt.2:16-18)
- Herod sihna (Matt.2:19).
- Aigupta a pan kikna (Matt.2:20-21)
- Nazareth ah tenna (Matt.2:22-23; Lk.2:39-40). Huchiin “amah zaw Nazareth mi a chi ding uh” chia zawlneite’n a genkholh uh hong tangtungta hi. Nazareth ah hong khanglian in, pilna a dim in a tung ah Pathian deihsakna a om hi.
Jesu Khrist hong pianna thu leh thiltung dante i et leh Pathian’ thilgelte leh thuchiamte aman hun achih bangbang a tungtou zel ahihdan muh theih hi. A hun, amun, huai hun a mite Pathian in eite theih ding a poimoh a sak teng chiangtak in ana langsak hi. A pianna mun leh thil tuamtuamte a hon hilh hang in, a pian ni pen genlawk khak in ana om hetlou hi.
Unaute nitakpha. Mangpha leh ihmut lim chiat.