Toupa angel khat gimlim halna maitam taklam a dingh in akiang ah akilak hi. Zakariah in amuhtak in alungzing a, lauh leng alau hi. Himahleh angel in akiang ah, “Zakariah, lau ke’n, na ngetna zak a a-om ziak in, na zi Elizabeth in tapa hon neihsak dia, amin Johan na sak ding ahi (Lk.1:11-13).
Tuni i tangteel tuh Baptistpa Johan pianna di toh kisai a apa Zakariah kiang a Gabriel a va kilakna ahi chih i thei hi.
Abijah pawl tuh kumpi David in siampute khen 24 a hon khen hun a akhen (division) giatna ahi uhi (1 Kro.24:10). Hiai khen 24-ten temple ah kal khat sung sem in kikhek kual zel ua, kum khat in khen (division) khat in nih vei khawng a tangkha uhi. Johan’ pa Zakariah tuh Aaron suan Abijah pawl a mi ahi chih i thei hi (Lk.1:5).
Israelte a saltanna ua kipan hong kik nung un Aaron suan siampute naktak in pung ua, siampu nna sem thei tam mahmah uhi. Biakbuk (temple) sung Mun Siangthou a gimlim hal pen siampu khat kia nasep ahihman in khen (pawl) khat sung a siampu tampi omte’n kum khat a kal nih sung kia hun nei ahihman un siampu tengteng ading in tan zoh hilou hi. Huaiziak in hiai nna sem ding tuh aisan (lot) in a tel thoh zel uhi (Lk.1:9). Damsung a khat vei le hiai nna sem khalou siampu tampi om ua, hiai hamphatna tangkhate’n leng a damsung un khat vei kan a tangkha ban kei uhi. Hiai nna septheihna ding in dan bu hoihtak a theih poimoh a, dan in a ngiat bang a siangthou ngai a, bawlkhelh khat leng a omlouh kuul hi. Huaiziak in siampute a ding in hiai nasep tuh hamphatna tungtuan leh zahtakna thupitak tanna nasep ahi hi.
Johan’ pa Zakariah tuh hiai nna tang kha in, gimlim hal in a om chih tuni i tangteel ah i mu hi. Hiai gimlim hal a a-om laitak in Toupa angel Gabriel hong kilak in Johan pian ding thu hong gen hi.
Hiai thiltung tuh Pathian in zawlnei Malaki a sawl nung zawlneite dang kuamah sawl nawnlou a, kuamah kiang a leng kilak nawnlouh a, kum 400 adaih vengveng nung a hong kilak masaknapen ahi hi. Zawlneite’n ana genkholh uh, a ngaklah mahmah uh Messiah adia mipite mansa a omsaktu ding tuh Johan pian ding thu genkhiak ahita hi (Is.40:3; Mal.3:1).
Tuni i tangteel akipan Pathian tuh a thuchiam a muanhuai, a thilgeelte ahunhun a tungsak zel, mihingte a ding a thil hitheilou ahih hun in leng tungsak theitu ahihdan i mu thei hi.
Kum 400 vengvung nung a athuchiam mangngilhlou a tungsakpa Pathian mah ahi tuni a i Biak chih mangngilh kei ni. Huaiziak in ei amah thuchiam ah ginom peuh le hang Aman amah nna a hun achih chiang in hon sem mai ding hi.
Unaute sunpha. Tuni hun zatnuam chiat