Huan angel nihna in ahon zui a, “Pukta, pukta Babulon kho thupi, nam tengteng a migaihhatna, hehna uain dawnsaknu,” achi hi (Kil.14:8).
Belamnou toh dingkhawm a vualzohna la sa mipi 144,000-te mai ah angel khatna in thupuan hon nei a, “Pathian vaihawmna (thukhenna) ni hong tungta” chi in a kikou hi. Tuni i tangteel a i muh bang in angel nihna in, “Pukta, pukta Babulon kho thupi, nam tengteng a mingaihhatna, hehna uain dawnsaknu” chi in a zui ngal hi.
Thukhun Lui ah Babylon khopi tuh noptalna leh thangtatna toh kidim, Pathian’ misiangthoute nuaisiahna khopi ahi chih i thei hi. Huaiziak in Kilakna laibu ah Rome khopi tuh nidanglai Babylon toh tehkak in a om hi. Rome khopi puksiatna hun pen ataktak in AD 476 ah tung a, himahleh tuni i tangteel ah pukse khinta bang a gen in a om hi. Hiai tuh a lamdang ahi kei a, Pathian leh a melmate kidouna ah a vualzou ding theihsa, Pathian thuchiam a tung ngeingei thil ding ahihziak hiai bang thumal zat in a om hi. Thukhun Lui ah leng hiai bang in genkholhna (prophecy) kammalte Pathian zawlneite’n ana zangsek uhi (Is.21:9; 46:10;48:3; Jer.51:8).
Babylon (Rome) kho thupi tuh “nam tengteng a migaihhatna, hehna uain dawnsaknu” chih a om bang in Rome kumpite’n Pathian kiang kia a kitahlut a biakna piak ding pen amau leh a sahkhua ua kitahlut ding in mite lausak in khem ua, khalam ah mite puksak in ang a kawmsak uhi. Huaiziak in Pathian thukhenna ah tung uah a tung ding ngeingei ding chih muhtheih hita hi.
Hiai toh kisai leh Rome khopi puksiatna a chiangzaw sem in Kilakna 17 leh 18 ah muhtheih in om a, huai lam ah a chiangzaw in i gen ding hi.
Unaute sunpha. Tuni hun zatnuam chiat