Amah a zungkai leh lamtouha om in, a hon zilsak bang un na ginna ua kiptak a om in, kipahthugenna hau in, amah ah om un. Pilvang un, huchilou in zaw kuapeuh in Khrist thu bang hilou in, mihing thugousiah leh khovel thubulte bang zaw in a thupil uh leh khemna peuh in gallak in a hon lakha ding uh (Kol.2:7,8).
Laisiangthou in hon sinsakna toh kituak ginna a zungkai leh lamtouh a i om louh chiang in thutak ei ah poukhe mahleh azung a omlouh ziak in si kik thei hi. Huchiin Khrist sinsakna bang hilou, khovel pilna leh thugensiamna ten i lungsim hon zou in, a tawp chiang in i theihlouh kal in gallak in honna la mang sek hi. Huaiziak in Khrist a zungkai leh lamtouh a om diing in ginna ah kiptak in ding ni.
Unaute zingpha. Tuni hun zatnuam chiat.