Jesu Khrist, theihpihpa ginom, misite lak a piang masapen leh leitung a kumpipate vaihawmpa ahi. Eite hon it a i khelhna a kipan a a sisan a honsawppa amah kiang ngei ah; leh lalgam hi ding a honbawl, Pathian leh a Pa kiang a siampute hi ding a honbawl, amah kiang ah thupina leh vaihawmna, tangtawn, tangtawn in om hen, Amen (Kil.1:5,6)
Tuni i tangteel ah Jesu Khrist hihna bangzah hiam i muhtheih om hi. Theihpihtu ginom, misite lak a piang masapen leh leitung kumpite tung a vaihawmpa chih a gen in om hi. A ban tang 8 i simsuk leh Alpha leh Omega, abul leh atawp, omsa om lel leh hong pai ding Bangkim hihthei chih a gen in om hi.
Kilakna laibu tuh Rome kumpite sawina naktak a thuak khristiante khamuanna ding a gelh ahihmah bang in hiai bang hun ah i Toupa Jesu Khrist hihna theihtelna in khamuanna pe tuam mahmah ding hi. A thuakna uh Pathian in phawklou leh khawksak pihlou ahi diam chih ngaihdan nei om khate a ding in leng Khrist in theihpih, Theihpihtu muanhuai ahi, amaute sawi a thattu Rome kumpite tung a thuneitu Khrist ahihdan theihna in khamuan tuan mahmah ding hi.
Kilakna laibu tuh kumzabi khatna hun a khristiante a ding kia hilou in tuni a nang leh kei a ding a leng khamuanna laibu ahi chih mangngilhlouh poimoh hoih hi. Khat veivei mihingte’n i haksatluat ziak bang, ginomtak a i pannate kuaman hon phawkpihlou ahi diam chih ngaihtuahna leh thil tuamtuamte’n lungkiatna hon tun in khalam ah nungtolhna hon tun thei hi. Himahleh Theihpihtu ginom, khovel mi thupi leh kumpite tung a thuneitu Bangkim hihtheih ahi chih theihchiang peuh le hang lungkiat huailou hi. Kilakna laibu a i muh bang in khovel etdan in khristiante a vuallel bang mahle uh a tawpna a Khrist in a vualzohpih mah bang in en leng Khrist ziak a vualzohna tang ngeingei ding ihi chih mangngilh kei ni.
Unaute zingpha. Tuni hun zatnuam chiat