Jesu Khrist kilakna, Pathian in a sikhate kiang a lahkhiak ding a amah a piak, thil hong ompah mahmah dingte: Huan aman a sikha Johan kiang ah a angel sawl in chiamtehna in a theisak hi (Kil.1:1).
Tuni i tangteel akipan Kilakna laibu theihsiamna ding a poimoh mahmah thu nih muhtheih in om hi.
Khatna ah Kilakna laibu tuh Thukhun Thak laibu dangte toh kibanglou in chiamtehna tuamtuamte zang a gelh ahi chih muhtheih hi. Chiamtehna zang a gelh ahihdan theihsiam louhna in Kilakna laibu theihkhelhna a hon tun hi.
Nihna ah Kilakna laibu tuh a tungpah mahmah ding thilte ahi chih leng muhtheih hi. Hiai tang kia hilou in tang dangte ah leng a tungpah mahmah ding thilte ahihdan muhtheih hi. Kilakna 1:3 in “a hun a naitak ziak in” chi a, Kilakna 22:6 in “Pathian in thil hong ompah mahmah dingte a sikhate kiang ah musak ding in a angel a sawlta hi” chi a, Kilakna 22:10 in “hiai laibu a genkholhnate bilhkhum ken, a hun a naitak ziak in” chi hi.Kilakna laibu gelh hun AD 95-96 vel a kipan a tungpah mahmah ding thilte gelh ahi uh chih theihsiam poimoh hi. Tunitan a tung nailou vek himawk leh huai hun a om mite’n hampatpih khalou ding uhi. Himahleh huai hun a khristiante hamphatpih ding a genkholhna thute ahi uhi.
Kilakna laibu tuh Asia gam a om saptuam sagihte’ kiang a khak ahi a (1:4), original recipient (a chiil a mutu) tuh hiai saptuam sagihte ahi uh chih mangngilhlouh poimoh hi. Huai saptuam sagihte hun a kipan sawtlou nung a tungpah ding thilte ahihziak in “bilhkhum ke’n” chia thupiak in a om.
Hiai thute theisiam a, Kilakna laibu sim a, khalam a phattuampih chiat ding in Pathian in hon vualzawl chiat hen.
Unaute zingpha. Tuni hun zatnuam chiat