Kei, Johan, Jesu Khrist a om haksa thuakna leh lalgam leh kuhkalna a, na unau uleh na tanpihpa uh, Pathian leh Jesu theihpihna ziak in tuikulh gam Patmos kichi ah ka om hi (Kil.1:9)
Kilakna laibu tuh Rome kumpi Domitian (AD 81-96) vaihawm hunlai a kigelh ahia, hiai kumpi Domitian tuh Patmos tuikulh a Johan khum bichilh tupa leng ahi chih khovel khangthu apan muhtheih hi. Amah hun in khristiante sawina leh gelgawtna in Rome lalgam pumpi zelsuak hi.
Tuni i tangteel a i muh mah bang in sawltak Johan ngei in leng “Jesu Khrist a haksa thuakna (tribulation) a na unau uleh na tanpihpa uh” (Kil.1:9) chi ahihman in saptuam sagihte’n leng gimthuakna (tribulation) tuak lellel uh ahihdan muh theih hi. Pergamos ah Antipas thah in om a, Jesu Khrist in Amah adia martar ginom ahi, achi hi (Kil.2:13). Smyrna saptuam in gimthuakna thupi nei ahihdan leh maban a athuakpah ding thilte laulou diing in hilh in a-om hi (Kil.2:9-10). Saptuam sagihte lak a saptuam ngate kiang ah sawina thu gen in om hi. Huaiziak in Kilakna laibu i sim chiang in khistiante’n sawina thupitak a tuah lai uleh a tuahtouh pah ding uh hun a thu kigen ahi chih theih a poimoh mahmah hi. Amau bang a khovel kumpite leh sawina tuamtuam i tuah hun chiang in amaute ginomna ngaihtuah in kihanthawn ni.
I tangteel mah ah Johan in, “lalgam a na unau uleh na tanpihpa uh” chi hi (1:9). Hiai in Kilakna gelh hun a Khrist lalgam om khin, kiphutkhe khinta ahi chih hon musak hi. Huaiziak in Kilakna laibu pansan a tunung chiang a lalgam hong kiphutkhe ding ahi chih sinsakna tuh a thu theihkhelhna ziak ahia, a dik kei hi.
Unaute zingpha/sunpha. Tuni hun zatnuam chiat