Kuamah in bangmah in hon khem kei uh hen; puksanna tak a hongtun masak phot a, khelhna mipa, mangthang tapa ngei a hong kilat keileh huai ni tuh tunglou ding ahi ngal a. Amah tuh Pathian a hihsak peuhmah uh leh, sabiak tengteng dou in, a tung ua om tum in a kihihthupi ding: huchi’n Pathian temple a tu in Pathian bang hial in a kitungkhe ding hi (2 Thess.2:3,4)J.
Jesu hong painawnna ding toh kisai sinsakna diklou tuhun kia hilou, Laisiangthou gelh hun lai mahmah in leng ana om hi. Khenkhat in Toupa hong painawn khinta ahi achih ziak un huai sinsakna a kuamah in Thessalonika khua a khristiante a khemzoh louhna ding un tuni a i tangteel tuh Sawltak Paul in hon gen hi.
I Toupa Jesu Khrist hong painawn nailou ahi chih agen kawm a, huai ni hong tunma a thiltung ding nih a hon gen hi. Khatna ah thutak puksanna hong tung masa phot ding a, anihna ah khelhna mipa, mangthang tapa ngei a hong kilang masa phot ding, achi hi. Hiai thilte tung masa loupi a Jesu hong paikiklou ding ahi chih Kha Siangthou theisak in agen hi. A hong paini chet ding bel i Toupa Jesu mah in leng agen bang in, Pa kia lou ngal in theilou hi.
Thutak pialsanna a omta a, sabiak tengteng tung a kihihlian a, Pathian bang hial a kihihlian khelhna mipa leng a omta hi. Huaiziak in i Toupa Jesu tuh chiklaipeuh a hong pai thei gige ahita a, huai ding in i kiman hia chih mimal chiat ki-en in kisakhol leng ichi hi.
Unaute zingpha. Tuni hun zatnuam chiat.