Unaute aw, noumau tung thu ah Pathian kiang a kipahthu gengen ding him ka hi uh: huai tuh hihtuak him ahi, na ginna uh nakpitak a khanglian in, na vek ua na ki-it tuah chiatna uh tuh a khang tuantuan ngal a (2 Thess.1:3).
Hoihna kigentuah a, pahtakna kipiak tuh kihanthawnna vanzat hoihtak ahi hi. Upate, preacher-te, pasalte (husband), zite, nute, pate, tate, school pute hi in kua hitaleh midang te’n i hoih gen a phatna hon piak uh a za nuamlou ki-omlou hi. Huaiziak hiai chiindan neih kisin poimoh mahmah hi.
I hun tamzawte mi hoihna gensang in, a hoihlouhna lam uh gen a bawldik (correct) tupna in kizang kha sek hi. Kibawldikna poimoh lou chi ihi kei a, a poimoh i hih ngeingei ding thil ahi tham hi. Ahihziak in hiai kia buaipih i hih khak ding lauhuai hi.
Jesu tuh mi pahtak a siam mahmah hi. Mikhialte leng a ginna uh a phat hi. Simon in thil tampi ah hatzohlouhna a nei lai in leng a min ding in Peter (suangpi) chih apia hi. Kilhlup a om deklai in anungzui ten amah gum ngam kei mahle uh a hong thohnawn phet in mohpuakna thupitak, Thupiak Thupi, Tanchinhoih gen ding mohpuakna apia hi. Mohpuakna piak tuh i muanna latsakna, phatna chi khat achih theih hi.
Na kisaikhakpihte hoihna gen a, na pahtakna leh phatna na genpih nanungpen bang chik ahia chih ngaihtuah sin mah dih. Na insung ah na tate, na zi, na pasal, na nu leh pa, na lawm leh vual, saptuam sung ah heutute a hoihlouhna sang un a hoihna uh muh sawm inla, phatna ding na muh leh a kiang uah na phatna thu gen sin mah dih. Na gintak sang in tha pe mahmah ding hi.
Hoihlouhna sang in hoihna lam kigentuah pi bawl le hang, i hoihlouhna kibawldikna ding omte i kigentuah chiang in leng kibawldik baihlam zaw ding hi.
Pa aw, midangte hoihnate leng mu thei a, a hoihnate uleh a phathuainate uh kipahpih thei din hon panpih in.
Unaute zingpha. Tuni hun zatnuam chiat.