Huchi a amah ka muhtak in, misi bang in a khebul ah ka pukta hi. Huan aman a khut taklam ka tung a koih in, “Lau ken, a masapen leh a nanungpen ka hi. Mihing ka hi; ka hongsi a, ngai in tangtawn in ka hing hi, sihna leh misi khaw tahbi ka nei hi. Huaiziak in na thil muhsate, thil omlelte leh tunung a thil hongom dingte gelh in (Kil.1:17-19).
Tuni i tangteel malam tang 8 leh 11 i sim leh “Kei, Alpha leh Omega, abul leh a tawp ka hi” chi’n Jesu’n gen a, tuni i tangteel ah leng “amasapen leh a nanungpen ka hi” chi’n kigen hi. Alpha leh Omega tuh Greek alphabet kibatna leh atawpna ahi. Laikhak simtu masate a ding in a heutupa uh, a nna a sep uh Jesu Khrist tuh khovel thuneitute tunglam pek a tangtawn a om, a masapen leh a nanungpen ahi chih theihthakna in khamuan tuam ding hi.
“Ka hong si a, ngai in tangtawn in ka hing” a kichih mah bang in, khovel mihingte mitmuh a sikhin dan a theih a om Jesu tuh, misi hi nawnlou in ahing, tangtawn a om in muh in a om hi. Nak lungmuanhuai tuan didan maw! Huai Jesu mah tuh zan leh tuni leh tangtawn a angeingei ahi chih thei in, khemna i tuah hun in ngaihtuah le hang chihhuai hi.
Tuni i tangteel in Kilakna laibu simtute theihsiam theihna dia poimoh khat hon gen hi. Hiai tuh “na thil muhsate, thil omlelte leh tunung a thil hong om dingte gelh in” chia Johan sawl a om ahihdan hon lak a, huai mah tuh Johan in hon gelhkhia hi. Huaiziak in Kilakna laibu tuh AD 95-96 hun lai vel a dia thil tungsa, a tung lel leh a tungpah dingte ahi chih mitkha toh sim ngai hi.Futuristic denominationte’n hiai a theihlouh ziak un tulai nasan a thil tungnailou dingte ngen in a sim uhi. Hiai theihkhelhna in sinsakna diklou pipi a piangsak hi. Hiaite a i buailouhna ding in hiai thute theihchet mahmah kul hi.
Unaute sunpha. Tuni hun zatnuam chiat