Ka khut taklam a aksi sagih na muhte leh dangkaeng tuikuang koihna sagihte thuguk hiai ahi: Aksi sagihte saptuam sagihte angelte ahi ua; tuikuang koihna sagihte saptuam sagihte ahi uh, a chi hi (Kil.1:20).
Kilakna laibu ah gentehna (chiamtehna) kampau tamtakte bang genna ahia chih tangtak a genchetna kimu kei mahleh tuni i tangteel in tuikuang koihna sagihte tuh saptuam sagihte ahihdan leh aksi sagihte tuh saptuam sagihte’ angelte ahi chih hon hilh hi.
“Angel” kichi thumal tuh “sawltak” (messenger) chihna ahia, van sawltak angelte genna leh Pathian mizat leitung mihingte genna in leng a kizang hi. Baptistpa Johan Pathian’ sawltak (messenger) a gen in a om hi (Mk.1:2). Kilakna bung 2 leh 3 a saptuam sagihte a laikhakna ah “saptuam’ angel kiang ah gelh in” a chi sese hi. Hiai in van sawltakte hilou in saptuam sung a sawltakte, update leh nnaseemtu makaite agenna ahi chih a langsak hi. Angel sagihte tuh Jesu Khrist’ khut taklam ah muh in a om a, huai in Rome kumpite’n sawina naktak a bawl lai ua le Pathian venbitna a om uh ahihdan hon hilh hi.
Tuikuang koihna chia kilet English ah lampstands ahia, meivak koihna chih bang in lehtheih ding hi. Lampstands tuh meivak hiam, candle in vak a piakkhiak theihna ding a atunna (stand) ahi. Meivak koihna ahihleh bel vak pekhe dia geel ahi chihna ahi. Himahleh meivak koihna teng in meikuang neiveklou hi. Meikuang nei meivak koihna tengteng leng vak a piakkhiak zah uh kibanglou hi. Tuni in leng saptuamte pen meivak koihna i hi gige uhi. Meivak pekhe dia lamet a i om zah dungzui uh i pekhe na uh hiam chih saptuamte’n ki-et gige poimoh hi.
Unaute zingpha. Tuni hun zatnuam chiat