Aw, Toupa hoihdan chiam him dih ua; amah a muanna koihmi ahampha hi (Sam 34:8)
Saul in thahsawm a adelh lai in David in a hinna humbitna ding in Gath khua ah tailut hi (1 Sam.21). Gath khua tuh Israelte melma Philistiate gam ahihmai kia hilou in, a mi lian uh Goliath-te khua leng ahi hi (1 Sam.17:4). Hiai khua a David ahong tailut chiang in kumpipa sikhate’n ana theitum pah in kumpipa Akish kiang ah hon pi uhi. David in kumpipa Akish a lauh mahmah ziak in a kihaisak a, huchiin a hong suakta thei hi. Hiai bang a hong suaktak nung in Sam 34 a hon gelh hi.
Tuni i tangteel en le hang David in Toupa hoihna amah mah in ana tuahkhaksa (experience), mi gen a atheih leh a zaksawn leng hilou, Toupa a muanna koihte hamphatna a hon gen hi. Gath kumpipa kiang a pi a omlai in David laulou hi hetlou hi (1 Sam.21:12). Pathian humbitna tuh Pathian muang a lau hetlou a om zoute a ding kia hilou; kihtak hun a leng amah zong a samte a ding leng ahi hi (Sam 34:4). Huaiziak in i mangbatni, i chihmohni leh lampi dang om nawn mahmah lou i sak ni in Amah kiang zuan le hang Aman hon humbit ding hi.
Eimah mah in i hinkhua a Pathian hoihna i chepkhak chiang in a manphatna kitheichian pan hi. David bang a Pathian hoihna theichian ding in Amah lam naih ni.
Unaute zingpha. Tuni hun zatnuam chiat