Huan Thaitira khua a saptuamte angel kiang ah hichibang in gelh in: Pathian Tapa, meikuang bang mit nei a sumsan nawttet bang khe neipa’n, hiai thilte a gen hi (Kil.2:18).
Thyatira tuh Pergamom khopi akipan simsuah (southeast) lam a om, kilometre 65 vel a gamla a om khopi ahi. Kilakna laibu a saptuam sagihte omna khopi sagih kigente lak ah a minthanglou pen leh huai hunlai adia poimohna neilou pen khopi ahi. Sardis toh Pergamom khopi kikal a om ahihna ah, hiai khopite kikal lampi vengtu ding in Rome sepaihte Thyatira ah koih in om uhi.
Thyatira tuh sumdawmna munpi, abik in puanlum leh puan rong zetuamtuam bawlna munpi khat ahi. Laisiangthou ah Lydia, puansandup zuaknu leng hiai khopi apan ahihdan i mu hi (Nas.16:14). Hiai khopi ah sumsin mite’ kipawlkhawmna (Trade Guild) puan bawltu (linen worker), savun puan bawltu (tanner), puan gantu (weaver), daalsum sektu (bronze smith), rong diahtu (dyers), belveltu, suak-le-sal zuaktu (slave dealer) chi in a tuamtuam in pawlpi nei tiltel uhi. Hiai pawlpite pen a vangkim in kimukhawm gige ua, akimuhkhawmna hunte uah nopbawlna chi tuamtuam zu leh milimte kiang a kithoihna sa leh thangtatnate a uang bawl mahmah uhi. Khristiante a di’n hiai pawlpite a kibual pen chouna thupi mahmah suak hi. Hiai pawlpite a kihellou mite a di’n lah sumdawnna neih theihlouh chihna toh kibang hi. Huaiziak in khristiante a ding in haksa mahmah hi.
Tuni i tangteel in Thyaitira saptuam kiang a laikhaktu Jesu in a hihna tuamtuamte lak ah Mihing Tapa, meikuang bang mitnei leh sumsan nawttet bang khe nei chih agen in a om hi. Meikuang bang mit nei ahihna in thil bangkim mu pailet leh khelhna hulmang sek ahihna a hon lak hi. Sumsan nawttet in a detdoun leh a muanhuaina a hon lak a; hiai sumsan nawttet pen tanglai hun in gawizanna vanzat ding in kizang sek a, Jesu Khrist tuh khelhna gawizantu ahihna hon musak hi.
Thyatira saptuam kiang a laikhak a i muh mah bang in Jesu’n saptuamte hihna leh omdante musuak in a theisuak vek a, a lak ua khelhna muh a omte a kitheihmohbawl kei hi.
Unaute zingpha. Tuni hun zatnuam chiat