Na thilhihte leh na itna leh na ginna leh na nasepna leh na thuakzohna ka thei hi, a masapen sang in na thilhih nanungte a tam zaw hi. Himahleh hiai thu ah demna k’on nei hi, huai numei Jezebel, zawlnei kichinu khawk na saklouh ziak in; aman ka sikhate kingaihna khelhna hih ding leh milimte kiang a kithoihna thilte ne ding a khem in a hilh hi (Kil.2:19-20).
Tuni i tangteel a i muh bang in Thyatira saptuam tuh lam chituamtuam ah Jesu’n a pahtakna i mu hi. A thilhihte uh, a itna uh, a ginna uh, a nasepte uh, a thuakzohna uleha nasep uh a pahtakna i mu hi. A nasep uh a masa sang a ananung lamte tamzaw ahihdan leng a gen hi. Saptuam tamtak a bultuung a hat mahmah himahleh a hong sawt chiang in dau deuhdeuh uhi. Himahleh Thyatira saptuam bel a tawp lam a hat deuhdeuh saptuam ahi uh chih i mu hi.
Pahtakhuaina tampi om hinapi zawlnei Jejebel khawk a saklouh ziak in demna a nei hi. Thukhun Lui ah Jejebel tuh Sidon kumpipa Ethbaal’ tanu ahihdan i mu a, Israel kumpipa Ahab’ zi ahihdan leng i mu hi (1 Kum.16:31). Jejebel tuh Pathian’ melma, a zawlneite hihlumtu ahi. Baal siampu 450-te kumpi sum zang in ana vak a (1 Kum 18:13-19), diklou tak in Naboth hihlum a, a Grephuan laksak hi (1 Kum.21). Angkawm leh bum hahbawltu chi a chiamteh in leng a om hi (2 Kum 9:22). Huaiziak in tuni i tangteel ah thutak apan pialsak a, khristiante milimbiakna leh thangtatna lam a pimangtu genna ding in kizang hi.
Thilhoih tampi semkhia a, hat mahmah I kisak lai a leng zawlnei taklou Jejebel sinsaknate i ngaihzam leh Jesu’n hon dem veve ding ahi chih Thyatira saptuam apan i zil thei hi.
Unaute zingpha. Tuni hun zatnuam chiat