Huai thilte i lak ua takpetpet a gin a om, mi tampi’n a thu gelh a na tup uh, A tu’ng a pat a a mute leh thu nna sem te’n hon hilh bang un, Theophil aw, abul apat bangkim chiantak in ka sui a, kizom zel in nang a di’n kigelh leh a hoih ding, ka chi ahi; tuma a thu nang hon hilh uh a dik ngelngel hi chih na theihna di’n (Lk.1:1-4).
Tangthu i gen chiang in a tangpi in, “Nidang lai in khua khat ah… nidanglai in mi khat om a...” chihte bang in kipan tangpi hi.
Ahihleh Tanchinhoih Luke laibu bang chi’n akipan a? Tuni i tangteel i sim leh tangthu toh kibang het kei maw! Bang hiam suizui (investigation) neite thugelh ding mah a bang hi. Ahihkeileh khangthu suimi (historian) in a thu suite akipan thudik a muhkhiakte hoihtak a gelh dik chetchet sawm a thugelh toh a kibang hi. Gendan tuam in news reporter khat in a news lakna (source) muanhuai ahihdan amah mah in achet nung a hon gen a bang hial hi.
Tangthu tangpi toh tuh a kikhai mahmah hi. Huaiziak in Laisiangthou sim ngeilou hiam, ahihkeileh Laisiangthou ah bangpi om tuan kente chia ginglel sim na hih khaktak leh leng Luke laibu sim himhim mah dih; a thil gennop genchian kha na sa na hiam chih chian in. A taktak a Jesu mu a, hoihtak a theichiante akipan mahmah thute hon gelh ahihna ah i gintakna ding ziak na mu mahmah ding hi.
Pa aw, ka Toupa uh Jesu tuh a taktak ahihna na muhchian ua ka gintak theihna ding uh a ziak diktak non nutsiatte ziak in kipahthu kon gen uhi.
Unaute zingpha. Tuni hun zatnuam chiat.