Huan, Pathian biakinn a kipan a pai khiak lai in, a nungzuite lak a mi khat in a kiang ah, Sinsakpa, en dih, a suang leh a inn khawng thupi mahmah hi a, a chi hi (Mk.13:1).
Mark 12 tawpna ah meitheinu thohlawm thoh thu i mu hi. Mihau tampi tak in tampipi a khia ua, himahleh meithai zawngtak khat hong pai in dal dangka muza nih a hong khia hi. A neih tengteng pevek ahihziak in Jesu’n ana theitum pah hi.
Hiai meitheinu thohlawm thu toh kizom in temple hoihna in nungzuite lungsim a lakdan thu hong kigelh hi. Hiai ah nungzuite lungsim khoihkha thilte leh Jesu’ lungsim khoihkha thilte kibatlouhna muh theih ngal hi. Nungzuite lungsim bel temple thupitak, suang a kibawl (suksiat pah a om ding) in a khoihkha pah a, himahleh Jesu lungsim bel meithainu kipiakzohna in a khoihkha zaw hi.
Tuni a i thupi ngaih leh i lungsim hon la pente bang thilte ahia chih mimal chiat ah kidong lehang uthuai mahmah hi. Khovel a thupina, hausakna, minthannate leh inn hoih taktakte hia?
Khristiante’n i Toupa Jesu’ mit in en thei lehang hiai mangthang pah ding thilte bangmah ahihlouhdan kimu thei ding hi. Huaite sang in midangte’n bangmah a angaihlouh uh Pathian a ginna hoihtak nei a kipe zou takte kingai thupi thei zaw ding hi.
Pa aw, ka Toupa uh Jesu Khrist mit a hak a, khua mu thei ding in hon panpih in.
Unaute zingpha. Tuni hun zatnuam chiat.