Noute a ding a ka hon thumsaknate tengteng ah, kipak tak in noute a ding in ka hon ngetsak sek hi. Ni masapen apan tu dong a Tanchinhoih nasepna a na hon kithuahpihnate uh ziak in Pathian kiang ah kipahthu ka gen hi (Phil.1:4,5).
Philippi saptuamte tuh Sawltak Paul Tanchinhoih genna a kithuahpih a, a haksat hun a panpihna petu saptuam ahi uhi (cf.4:14-17). Tuni i tangteel a “kithuahpihnate” chia kilet tuh Greek ah “koinonia” ahia, English ah “fellowship” (NKJV) ahihkeileh “partnership” (NIV, ESV, etc) chih bang in kilet hi. Hiai “koinonia” thumal tuh Macedonia leh Akaia gam a saptuam ten Jerusalem a misiangthoute panpihna thilpiak a piakna thu uah leng zat in om hi (2 Kor.9:13). Laisiangthou ah hiai “koinonia” thumal khristiante leh khristiante kikal, ahihkeileh khristiante leh Pathian kal kia ah zat in om a, ginglou mite toh kizopna ah kizang ngeilou hi.
Tanchinhoih gentute panpihna, huhna leh vakna i piakte tuh amau toh nna i sepkhawmna, a nasep ua i tel khakna ahia, huai tuh kithuahkhawmna (partnership ahihkeileh fellowship) ahi hi. Huai kithuahkhawmna omlou pi in a Tanchinhoih genna nasep uah tan kineikhalou hi.
Unaute zingpha. Tuni hun zatnuam chiat.