Naupangte aw, Toupa ah na nute uh leh na pate uh thu mang un: huai tuh thil dik ahi ngal a. Na nu leh na pa zahtak in, (hiai tuh thupiak chiam nei masapen a hi), Huchi’n nang a di’n a hoih dia, lei ah leng na damsawt ding hi (Eph.6-:1-3).
Pathian in nu-leh-pate thu i man ding a deih hi. Himahleh nu-leh-pate’n Pathian thu a hon chiillouh ua, Laisiangthou toh kituaklou thupiak hon neih uleh zuih teitei ding chihna hilou hi (Matt.10:37; Nas.5:29). Pathian thutak i zuih ding hon phal kei ua, khristian i hih ding hon dal uleh nu-leh-pa thu man pen khelhna hi zaw ding hi.
Nu-leh-pa thu man hoih mahleh huai sang in zahtakna (honour) piak Pathian in poimoh ngaihzaw hi. Laisiangthou kalh a honpi hun ubang, ahihkeileh a mawl ziak un a thugente uh Laisiangthou kalh sese hi kei leh leng i zuih louh a hoihzawk hun om thei hi. Himahleh hiai bang hunte ah leng simmoh mailou a zahtakna piak teitei tuh Pathian deihdan ahi.
Nu-leh-pa zahtakna Pathian in a poimoh ngaih petmah ziak in hiai thupiak zuite kiang ah leitung a damsawt ding chih thuchiam (promise) a bawl hial hi. Pathian thupiak tengteng lak a hiai na zuih leh hiai kon pe di chia, thupiak chiam nei masapen ahi hi.
Unaute zingpha. Tuni hun zatnuam chiat.