Huan, amahmah in, kuapeuh zakna ding a bil nei in za uh heh, a chi a (Mk.4:9).
Tamtakte’n Laisiangthou sim tam, a bu simsuak tam hih bang ki-ut a, thilsia ahi het kei hi. Himahleh a simtam pen i tup kawmkawm in a sim dan “quality” khansak pen i tup leh ngim pipen hileh a hoih zaw diam chih theih hi. A thu ngaihtuah hetlou, a thu le thei tuanlou a mawk sim om thei hi.
Tuni i tangteel thu a Jesu’n Buchithehpa gentehna thu agen akipan Laisiangthou sim a sim thoh pen hun tawklou ahihdan hon lak hi. Zakna gahsuah a om theihna ding in thuzakte pomtheihna lungtang a poimoh bulpi ahi hi. Jesu’n, “Lei hoih a tuh bel hiaite ahi uh; thu za a, pom a, a leh sawmthum khawng, a leh sawmguk khawng, a leh za khawng a gahte ahi uh” a chi hi (Mk.4:20).
I lungtang bang a chi a, mimal kivel chiat leng:
- Laisiamgthou na sim chiang in na diklouhna hon kawk kha pen a na theihte donlou hiam ahihkeileh nelhsiah a paikan in na omsek hia? Lungtang taak nei na hi kha ding!
- Pathian thu na sim chiang in lauhthawngna khat nei in na kithei hia? Ahihkeileh a phattuam luatna theilou a, chiindan ngeina dan maimai a ngai? Na ginna hawm deuh, na lungtang suangsi ten dalkha ahi diam?
- Na lungtang ah Pathian’ thu a masapen in na koih hia? Ahihkeileh thildang tuamtuam na ngaih poimohte dan khat maimai a koih? Na lungtang loulingnei ziak a khovel lungkhamna leh duhgawlnate’n hon gahsak taktak theilou hi kha ding hi.
I hinkhua a Pathian thu in gah a suah theih keileh bang i hih dia? Sim tam kia hunsak lou in thum tam zaw in. Pathian kiang ah na lungtang in athu ngaina a gah asuah theihna ding in chihtaktak in thum in.
Pa aw, na deihdante ka lungtang ua ka theih ua, ka khalam hinkhua ua na deihdan zui a gah ka suah theihna ding un hon panpih in.
Unaute zingpha. Tuni hun zatnuam chiat.