Huan, sawltakte Jesu kiang ah a hong kikhawm ua, bangkim, a thilhih peuh uh leh, a thuhilh peuh uh, a hong hilh ua. Huan, ama’n a kiang uah, noumau kia in gamdai mun ah a tuam in hong unla, khawl tadih un, a chi a. Mi lah tampi a hongkuan leh a pai a kiphamat ua, an nangawn leng a neman kei uhi (Mk.6:30,31).
Nasepduh (nasep addict), nasep ding kia buaipih mi na hi hia? Hiai thute hoihtak in ngaihtuah sin mah dih:
- Hun awng nei manlou a, nna kia sem gige a hun na zatna ziak in poimoh biik in na kingaihtuah hia?
- Midang ten nasep duh lua na hi hon chi ngei uhia (nang huaite hon phatna dan ua la)?
- Khawl tawldam a na om chiang in na hun pammaih sa in haksa na sa hia?
- Na tate na don leh kimawlpih kawm in phone ah na pau ngei hia?
- Phone a mi toh kihou lou a nitum a na om nanungpen bang chik ahi dia?
- Kal khat sung a dakkal 60 val bang nna sem a na om nung a leng nna tam sem khe zoulou a kingaihtuah in na kimohsa lai hia?
- Na zi leh ta te’n inn a om man mahmah lou chi a hon gen chiang un, nuamsa lou a heh in na om sek hia?
- Dotna poimoh pen tuh hiai ahi: Na buainate nang leh na inkuante phattuamna ding kia hia ahihkeileh Pathian a ding?
Buai luat zozen leh nasepduh luatna pen a se pumlum hi kei mahleh, hun thoveng leh hun awl i neih zelzel leng taksa leh khalam a din poimoh hi. Ahihleh bang chiin hiai i nasepduh luatna pen i taisan thei dia? Kross lam i zot a, nna tam i sepkhiak ziak hilou a, Pathian in hon itna ziak a i hinkhua manpha ahihdan ngaihtuah thak poimoh hi.
Nasep awl bawl deuh a, hun awl leh thoveng kipiak a, inkuante toh hun thoveng zatkhawmna leng bawl zel ngai hi. Huchiin Pathian thu ngaihtuahna hun ding leh thumna hun ding leng i nei thei ding hi.
Pa aw, Nang adia leng hun thoveng nei manlou khop a hinkhua ka zat khaknate uah hon ngaidam in. Nang adia le hun thoveng kon piak zel sam na ding un hon panpih in.
Unaute zingpha. Tuni hun zatnuam chiat.