Ka innsung a an a hong om theihna ding in koihkhawmna inn ah sawm-a-khat a vek in hon lalut un, huan huai in kei hon entel un, sepaihte Toupa’n a chi, a koihna ding dantan kiching om lou khop in van tawlette k’on hong in, vualzawlna k’on buakkhe kei na hiam (Mal.3:10).
Tuni a i tangteel tuh denomination tuamtuamte’n sawm a khat pe ding a kiphutna a azat uh Laisiangthou tang poimoh tak ahi. Himahleh hiai thupiak tu Thukhun Thak hun a kipia ahi kei a, Thukhun Lui, Mosi’ dan kizat lai a thupiak ahi hi. Hiai Sinai tang a Mosi’ dan tuh kross ah lakkhiak ahita hi (Kol.2:14-17; Gal.3:24-25; Rom.10:4; 2 Kor.3:7-14, etc.). Huaiziak in hiai thupiak zang a sawm a khat pe dia kiphutluih tuh, Pathian phutlouh mihingte phutluih a suak hi.
Sawm a khat tuh Israel-te a ding a Sinai tang a Pathian in Mosi tungtawn a apiak ahi chih Laisiangthou in chiantak in hon hilh hi: “Gam sunga sawm-a-khat peuhmah, gamsung a haichi hitaleh, singgah hitaleh, TOUPA a ahi; TOUPA a dia thil siangthou ahi…Hiaite Israel suante ding a Toupa’n Sinai tang Mosi kianga thupiak a piakte ahi uh” (Lev.27:30-34). Huaiziak in Thukhun Lui hunlai in leng sawm a khat tuh Israel nam hilou namdangte kiang ah phut hilou hi.
Sawm a khat netu ding tuh Levi siampute ahi chi in Pathian in a na gen hi (Nam.18:20-23). Thukhun Thak ah siampu hihna suklamdan in a omta a, taksa a Levite siamputna a beita hi. I Siampu Lianpen Jesu Khrist tuh Levi nam akipan hita lou in, Juda nam akipan ahi zaw ta a, khristiante tengteng tuh siampute ihi zawta hi (Heb.4:14; 2 Pet.2:9). Siampu hihna a lamdan tak ziak in dan thu leng hih lamdan in a omta hi (Heb.7:12). Gendan dang in gen le sawm a khat piak teitei ding chia kiphutkuihna Mosi’ dan, Sinai tang a kipia tuh a beita hi.
Thukhun Thak koimun mah ah sawm a khat pe ding a thupiak piakthakna omlou hi. Denominationte hih bang a kiphutluih a sawm a khat piak a ngai nawn kei a, Pathian kiang a thilpiak tuh vualzawlna i muh bangbang (1 Kor.16:2), phutluih hilou a mahni kiphalna bangbang a piak ding ahi zawta hi (2 Kor.9:6-8).
Unaute zingpha. Tuni hun zatnuam chiat.