Himahleh ngaihkhiak a ut kei ua, paupeng tak in a kihei mang ua, a bil uh a hum ua a zak louhna ding un. A hi, suang tak bang in a lungtang uh a bawl ua, huchikeileh dan a za kha ding ua, zawlnei masate khut a a Khaa sepaihte Toupa’n a thu khakte a za kha ding uh; huaiziak in sepaihte TOUPA a kipan nakpi a hehna a hongtung a. Huan hichi a hong hi a, Ka kikou lai in, a za nuam kei ua. Huchi’n a kikou uh, ka za kei ding, sepaihte Toupa’n a chi (Zek.7:11-13).
Khut langnih tuak a bil bang hum tuntun hial a, nu leh pate thugen ngai utlou a, lehlam kiheisan naupang na muh chiang in bang chi na sa a? Nalh i sak gintakhuai lou hi.
Pathian thugen ngai utlou a i om chiang in ei leh ei kimuthei hile hang kilawm i kisa diam? Van a angelte’n hon ensuk uhenla; i bilte hum a, Pathian thugente ngaihsak lou a, lehlam i ngatsan hon mu le uh nalh a sa duam? Bang ziak a Pathian in mi hichitel khawng buaipihpih ahi de aw chi’n ngaihdan a nei mai duam chihte ngaihtuah tham hi.
Pa aw, genhak leh kisathei tak a ka omnate uh hon ngaidam in. Ka tung ua na dohzohnate ziak in ka kipak uhi. Na mai a kingainiamtak a ka kitahlut theihna ding un hon taihilh in.
Unaute zingpha. Tuni hun zatnuam chiat.