Toupa mahmah kikou aw toh, angel tungnungpen aw toh, Pathian pengkul ging toh, van a kipan a hong paisuk ding ahi ngal a, huan, Khrist a sisate a thou masa phot ding ua; Huai khit chiang in eite hingdam a na omlaite, huihkhua ah Toupa tuak ding in amau toh mei lak ah laktouh in i om ding ua; huchi’n khantawn in Toupa kiangah i omta ding hi (1 Thess.4:16,17).
Tuni i tangteel in i Toupa Jesu hong pai nawn chiang a aguk a hong pai ding ahihlouh dan hon musak hi. Kikou aw toh, angel tungnungpen aw toh, pengkul ging toh van akipan hong paisuk ding ahi chih hon hilh hi. Huaiziak in rapture sinsakna bang a aguk a misiangthoute hong gumang ding chih tuh a dik kei hi.
“Khrist a sisate a thou masa phot ding ua” chih a om ziak in Rapture hun chiang in Khrist a sisate thounawn masa phot ding ua, himahleh mikhialte bel a nung Kumsang Lagam zoh chiang in thounawn pan ding chih a sinsak uhi. Himahleh hiai sinsakna a dik kei hi. I tangteel in Khrist a sisate leh Khrist a siloute thohnawnna ding thu gen ahi kei a, Jesu hong pai dong a hingdam a om laite’n Khrist a sisate makhelh lou ding ihi chih hon hilh ahi zaw hi. Khrist a sisate a thou masa phot ding ua; huchiin hingdam a na omlaite toh huihkhua ah Toupa tuak ding in mei lak ah laktouh in i om ding uhi. Tuni i tangteel in mikhialte thohnawnna ding toh kisai bangmah genkha lou hi.
Unaute zingpha. Tuni hun zatnuam chiat.