Toupa thu tuh noumau a kipan in a thang kheta ngal a, Masidonia leh Akhaia gam ah kia hilou in, mun chih ah Pathian lam a na gindan uh a thangta hi; huan, kou bangmah ka gen uh a kiphamoh kei hi (1 Thess.1:8).
Thessalonika khua a saptuam tuh Paul leh Sila ten Khawlni (Sabbath) thumvei lel Pathian’ thu a suutpih ua kipan hong dingkhia ahi (Nas.17:2). A gingtalou Juda mi khenkhat ten a sukbuai ziak un sawt a ompih thei kei uhi. Pathian’ thutak zui tung, khalam a suakthak himahle uh a ginom mahmah ua, amau akipan Pathian’ thu thangkhia in, mun tuamtuam a saptuam omte a ding in etton tham in a om uhi.
Tualsung saptuamte Tanchinhoih genna lam a i hatna ding leh midangte a ding a etton taak i hihtheihna ding in upat thu hiam, i dingkhiakna a sawt leh tom in thu pawpen hetlou hi. Saptuam i dinkhiakna kum tampi ahihziak leh khristian ihihna kum tampi ahihziak in midangte a ding a etton taak ihi pah tuan kei a, Pathian a ding a i ginomna leh ginnate ziak in midangte’n hon etton zaw uhi.
Thessalonika saptuamte khalam a naupang chik, theihna bukim nei nai hetlou, tualsung saptuam khenkhat dan a Paul ten sawtkhop a ompih uh hikei mahle uh Masidonia leh Akhaia gamte a ding a ettontaak ahihbang un tuni a ei leng hi thei ihi chih mangngilh kei ni.
Unaute zingpha. Tuni hun zatnuam chiat.