…Huan, Pathian limsak di’n kithuzoh in; Pumpi kithuzohna (exercise) a hihleh a phatuam zek a; Pathian limsakna i chih leh khantawn in, hinna, tua omsa leh hong om nawn ding piak chiamna a neih ziak in thil tengteng ah a phatuam hi. Hiai thu tuh a muanhuai in a laktuak mahmah hi (1 Tim.4:7-9).
Exercise bawl gige zoute taksa ah leng dam theih deuh ua, a taksa hiang tuamtuam ua sigui, guh-leh-tang omte’n leng nna a sep ding bangtak un sem thei zaw uhi. A melpuak uleng ki-fit deuh pah ahihman un etlawm suak deuh pah ua, midangte sang in tan leng tangzang zaw deuh uhi. Exercise bawl gige zou le hang i damtheihlouhna tampite kiventheih ding leh a dam ding om hi. Huaiziak in Sawltak Paul in Timothy kiang ah pumpi kithuzohna (bodily exercise) a phattuamna a genna ah, i taksa tung leh khovel i khosakna thil kia a phatuam ahihziak in “a phatuam zek” achi hi.
Himahleh Pathian limsak dia kithuzohna (exercise) bel khovel thil kia hilou in, i khalam leh i tangtawn thil ding toh kisai ahihman in thil tengteng ah a phatuam, achi hi. Laisiangthou in thil tengteng ah a phatuam achih om sun tuh Pathian limsak dia kithuzohna ahi hi. Hiai kia le hunsak lou in, “hiai thu tuh a muanhuai in a laktuak mahmah hi” a chih behlap lai hi. Huaiziak in Laisiangthou gingta khristiante a ding in nelhsiah theihvual thil ahi kei hi.
Khalam ah hat gige, thanuam gige, thumna leh phatna lasakte ut gige kichi thil hi thei hilou hi. Himahleh i peihlouh lai a leng Pathian limsak dia kithuzoh teitei tuh a poimoh hi. Huaiziak in na thanop ziak kia in kikhawm, thumna nei, phatna la sa, Laisiangthou sim in om kenle; Pathian’ ta na hihna ah na mohpuakna leh hih ding a Pathian in hon deih ahihziak in hih zaw in. Huchiin na peihlou hun leh na thanop louh hun in leng na kithuzoh thei ding hi.
Unaute Toupa’ ni zingpha. Tuni kikhop nuam chiat.