Ngai in, ka damsung khutpek tan phet in na siam a; ka kum na mitmuh in bangmah tham ahi kei a; michih ahoih lai pen un bangmah lou lel ahi vek uhi. Selah (Sam 39:5)
Kumthak 2026 adia Toupa’ ni masapen mel hon musak i Pathian kiang ah kipahthu i gen hi.
Pathian khut danglou len in chih la phuaktu Jennie B. Wilson in a ngeklai in apa suun a, kum 4 ahih in damlouhna khawktak (spinal illness) nei in wheelchair toh a damsung hun zang den hi. Midang bang a khe a mahni kipai theilou ahihziak leng ahi ding a, hun leh kumte pai hatdan leh leitung thilte’n a daihsawt louh dan theichian mahmah in “Hun kikheng in bei pahpah, lei thil ding gige omlou, tangtawn thilte kia lamen in, Pathian khut danglou len in” chi’n la ngaihnophuai tak hon phuakkhia hi.
Hun pai zungzung a kum leh kha hong kikhek zelte’n khovel thilte om denlou ding ahihdan hon muchian sak hi. I naupang deuh lai in kum khat bang sawt kisa thei mahmah a, himahleh i hong upat deuhdeuh chiang in mitphiatkal khat lel bang in bei pahpah hi.Khristiante’n hun tamzaw ah i buaipih leh i hun manpha i piaknate leitung thil, neih leh lam leh khovel i khosakna ding a poimoh thilte ahi sek hi. A poimoh leh alou-theilou mah ahihziak in miteng in deihpen leh delhpen in kinei sek hi. Himahleh hiaite sawtlou chik nung a beipah ding thilte ahi ua, a mangthang ngeilou vangou hon nelhsiah saktu ahihkhak ding uh kivenhuai hi. Huaiziak in kumthak ah tangtawn thilte mitsuan masa in, Pathian khut danglou len gige ding in kisathak chiat ni. Kumkhat a Toupa’ ni 52 omte ah biakna pellou a tel gige ding in i hanchiam ngam diam!
I damsung zinna i zoh hun om ding hi. Huai ding a i damsung a kisakhol ihihna ah Pathian khut danglou len gige a, ginom tak a i khovel khualzinna zou thei chiat ding in panla ni.
Unaute Toupa’ ni zingpha. Tuni kikhop nuam chiat.