Amah ngakte kiang ah Toupa ahoih, amah zongmi tung ah (Kah.3:25).
Thilngak kichi nuam hetlou hi. Tulai khovel kinoh leh i sepgah muh pahpah utna lak ah thil ngak nilouh ngai chih tuh a thanophuai a bang kei hi. Himahleh Laisiangthou in Toupa ngak ding in hon sinsak hi.
Kahlate tuh hun haksat laitak leh lungkhamhuai laitak a kigelh ahi hi. Jerusalem suksiat a om in, Pathian mite’n a thumanlouh gah uh a thuak lel uhi. Hinapi Jeremiah in hiai bang haksat hunlai tak in leng Toupa a hoih chi’n a gen hi. Toupa tuh vangphat hun kia a hoih ahi kei a; Amah ngakte a ding in thuakgim laitak in leng a hoih hi.
Mihingte’n hun i chih leh Pathian in hun achih a kibang gige kei hi. Huaiziak in Pathian ngakna tuh dawnna omlou a bat hun a leng Amah hun seh ngak ding a muanngamna ahi hi. Thumanna toh thumna leh a thu tungtawn a Amah deihdan zong a; en i muh theihlouh hun a leng ei adia a hoihzaw a nna sem ahi chih muanngam poimoh hi. En ngakzou peuh le hang Aman hun achih hunhun ah nna sem hi.
Unaute zingpha. Tuni hun zatnuam chiat