Huan, Simeon in amau a vualzawl a, a nu Mari kiang ah, Ngai in, hiai naupang Israel lak a mi tampi pukna ding leh dinkhiakna ding a seh ahi, gensiat a om chiamtehna hi di’n leng. (A hi, nang lungtang leng temsau in a dawt pailet ding a) huchia mi tampi’n a lungtang ua a ngaihtuahte uh a latna di’n, a chi hi (Lk.2:34,35)
Tuni a i tangteel tuh i Toupa Jesu ni giat a chin a Jerusalem a zeksum dia anu leh pan a hohpih lai ua, Khasiangthou theihsak a Simeon thugen ahi. Mi’n i tate kipahpihna leh pahtakna thu hon gen chiang un i kipak mahmah hi. Mary adia a tapa Jesu bel mite muhdah, gensiat, hazat leh deihlouh a hong suak hi. Gensiatna kia hitalou in, a tapa a hong man ua, hehpihna tellou in a soisa ua, Juda vaihawmna inpi, Pilat kiang leh Herod kiang ah a pilut ua, ama khelhna om hetlou hinapi in mohkhuksak ahia, mihing mel leng pulou khop a soisak in a om hi. Mi nu khat a ding in i tapa lawmlawm hichia kibawl muh mai ding tuh na mahmah ding hi. Simeon in na lungtang temsau in a dawt pailet ding achih dik mahmah mai le kilawm maw! Pathian in ana teel, nungak siangthou, i Hondampa hong pianna nu, mi hampha chih a om nu’n tuh leitung ah kinepna ding neilou a bang hial hi. Jesu nung i zuihna ah leitung a phattuamna ding i kinep chiang in vangam ah bangmah kikhol kha theilou sek hi. Pathian in leitung ah kipahman hon pe ding hilou in, a nna i sep man van ah kipahman hon chiam zaw hi.
Unaute Toupa’ ni zingpha. Tuni kikhop nuam chiat.