Mipi lak a khat in, Jesu kiang ah, Sinsakpa, ka u kiang ah gou hon hawm sam di’n hilh in, a chi a. Himahleh, ama’n, a kiang ah, Mihing, noumau tung ah kua’n ahia kei thukhenpa hiam tanseppa hiam a hon bawl? a chi hi (Lk.12:13,14).
Biakin a kikhawm hinapi heh luatna na neih ziak in thugente ngaikhe hetlou in na om kha ngei hia? Tuni a i tangteel a mipa’n Jesu’ thugen ngaikhe hetlou a bang hi. Ama lam a Jesu’ thugente i et leh “lepchiahna” (12:1-3), “lauh ding” thu (12:4-7) leh “gupna” thu (12:8-12) chihte ahi hi. Jesu’n gawtmun thu a gen (12:5) za hetlou ahi ding a, a u toh gou kihawm ding thu kia in a lungsim luah a bang hi.
Pathian thu akipan i lungsim hon heikawi thei a tam mahmah hi. Jesu’n loulingnei tuh “damsung khosak ngaihtuahnate, hauhsaknate leh nuamsakna” toh kidim lungsim ahi achi hi (Lk.8:14). I hinkhua adia poimoh pen Pathian thu akipan lungsim hon lamang ding khovel thilte a tam mahmah hi.
Tuni i tangteel a mipa kiang a Jesu thugen ngaihtuah thak ni: “Pilvang unla, enna himhim lak ah kiveng un; *hauhna mihing dam san ahi kei hi” (Lk.12:15).
Pa aw, ka hinkhua ua ding a poimoh pen kha khalam thilte ua ka lungsim uh koih thei ding in hon panpih in.
Unaute zingpha. Tuni hun zatnuam chiat.